2118/2025-2026

Dated Aizawl, the 12th September, 2025: Vawiin tlai dar 02:50 khan Union Railway Minister, Pu Ashwini Vaishnaw chu Lengpui Airport-ah rawn tumin Chief Minister, Pu Lalduhoma leh a tawiawmtu Education Minister, Dr. Vanlalthlana; PWD Minister, Pu Vanlalhlana; Lok Sabha MP, Pu Richard Vanlalhmangaiha; Rajya Sabha MP, Pu K.Vanlalvena leh IPR&PS Secretary, Pi Betsy Zothanpari Sailo te chuan an lo dawngsawng a. Union Railway Minister chuan Sairang Railway Station chu tlawh nghalin Rail kawng chuan naktip atangin bungrua (Goods) a rawn phur tan tur thu a sawi.

Union Minister chuan thuthar lakhawmtute kawmin Rail kawng hawn a ni chu Mizoram tan mel lung pawimawh tak a nih thu sawiin Look East Policy tih hlawhtlinna pawimawh tak a nih thu a sawi a. Srinagar atanga Delhi-ah an apple thar chhuah tha tak tak thawn chhuah nan rail an hmang ang hian he Railway hmang hian Mizoram chuan an thlai leh thei neih tha tak tak, Dragon fruit leh state dangin an neih ve loh te chu an thawn chhuah theih tawh tur thu a sawi a ni.

Railway Minister chuan he hun hi Mizoram tana hun pawimawh leh chhinchhiahtlak tak, India ram state dang nena intlawhpawh tawnna, inkungkaihna tha zawk siamtu a nih a besei thu a sawi a. He rail kawng siam nan hian hun leh tha tam tak sen a nih thu sawiin he rail kawng a luh theih nan hian lei verh dan chi thar te hmuhchhuah a nih thu a tarlang a. Rail kawng luh theih nana theihtawp a tan latu zawng zawng chu an thawhrimnaah fakawm a tih thu a sawi bawk.

Pu Ashwini Vaishnaw hian thuthar lakhawmtute a kawm zawh hian rail-ah hian Bairabi thleng a chuang nghal a ni. Sairang to Bairabi railway bakah hian Rajdhani Express Aizawl (Sairang) - Delhi (Anand Vihar Terminal) inkar, Aizawl (Sairang) - Guwahati Express leh Aizawl (Sairang) - Kolkata Express chu naktuk hian Prime Minister-in a flag-off nghal dawn a ni.