4488/2025-2026

Lawngtlai, 16th February 2026: Vawiin khan Lawngtlai Bawrhsap Pu Donny Lalruatsanga, Lawngtlai Superintendent of Police Pu PC Lalchunglura leh Pu F. Lalrothanga, President, CYLA te chuan DC Office Chamber-ah Chanchinbu mite an kawm.

Pu Donny Lalruatsanga chuan Pu Lalramsanga, Lawngtlai AOC venga cheng thihna avangin hmalakna kawng hrang hrang kalpui mek a ni, a ti a. Thil sual titute chu 'foreigner' nimahse hremna pek ngei an nih theihna tura hmalak a nih tur thu a sawi . Pu Lalramsanga leh a thiante hi February ni 11 khan Myanmar ram Salachhuah bungraw dah tura kalin, February ni 12, zan 9:00 PM atang khan a chanchin hriat tur awm loin, tun dinhmun hi kan thleng ta a ni, a ti . CYLA, MTP leh LDPA - te nen thawhhona tha tak awmin, District Administration nen inrawntlan reng a nih thu a sawi a. Thihna hial thleng chu pawi a tih thu sawiin Bawrhsap chuan thupek khauh zawk chhuah a nih tur thu tarlangin, thla hnih chhung atan border pawh khar a nih tur thu a sawi. Pu Donny Lalruatsanga chuan Lawngtlai mipuite chiai lo tura chahin, chak taka hmalak zel a nih tur thu a sawi a ni.

Pu PC Lalchunglura chuan Pu Lalramsanga chanchin tlangpui tarlanna a nei a. Ni 15 chawhnu dar 3:00 PM velah Salachhuah leh Chhimtuipui infinnaah Pu Lalramsanga ruang hmuh a nih thu a sawi a. Police lamah FIR thehluh a nih tawh thu tarlangin case register - tawh niin, Phura Police station- ah transfer leh a ni ang a ti. SP chuan a chhuina chak taka kalpui a nih tur thu sawiin, murder case - a kalpui a nih tur thu a tarlang. CYLA leh MTP - te nen thawhhona tha tak a awm tih sawiin, pawi khawihtute chhuichhuaha hremna pe tura hmalak tum a nih thu a tarlang bawk.

Pu  F. Lalrothanga,  President, CYLA  chuan theihtawp an chhuah mek thu sawiin, MTP General Headquarters - te nen pawh thutkhawm neih niin, Press Release - pawh chhuah a ni, a ti. Pu Lalramsanga a bo tih hriat atang khan theih tawpa a zawk hna thawh nghal niin, Arakan Army - te nen pawh inbiakna neih a nih thu a sawi.CYLA anga chak taka hmalak zel a nih tur thu sawiin, District Administration - hmalakna an thlawp tlat thu a sawi nghal a ni.