4489/2025-2026

Aizawl dated 16th Febraury 2026: Vawiin khan Lianchhiari Run Mini Theatre, Directorate of Information & Public Relations, Aizawlah Mizoram Sawrkar Flagship programme ‘Bana Kaih Scheme’ hnuaia Chief Minister’s Special Package sem chhuahna hun leh Bana Kaih Scheme hnuaia Loan laten a pung an lo rulh tawh pek letna hun hman a ni a. Dr. Lalrinchhana, Principal Adviser cum Addl. Secretary, Planning & Programme Implementation Department chuan he hun hi kaihruaiin Dr. KC Lalmalsawmzauva, Adviser to Chief Minister (Implementation of Handholding Policy) chu khuallian a ni a. Bana Kaih Scheme kalpuitu Sawrkar Department leh Agency 21-a Nodal Officer, Assistant Nodal Officer-te leh a thawhpui Bank; Mizoram Rural Bank, State Bank of India, Mizoram Cooperative Apex Bank, IDBI leh UBI Bank-a thawktute he hunah hian an tel a ni.

Khuallian Pu KC Lalmalsawmzauva chuan Bana Kaih Scheme chu Mizoram tihmasawn tura thiamna leh theihna nei, mi taima leh hlawhtlin tum tlat mite zawn chhuah a, eizawnna ngelnghet an neih theihna tura tanpuina pek a nih thu a sawi a. Hlawhtlin ngei tumte chauh thlanchhuah an nih theih nan Sawrkar Department hrang hranga thawktute pawhin dilna lut thlitfim leh vil zui hna uluk takin an kalpui thin thu sawiin, Bana Kaih Scheme hnuaia Progress Partner ni tura thlan chhuah zingah loan rul tha lo an awm hriat a nih loh thu a sawi.

Adviser to Chief Minister chuan Bana Kaih Scheme hlawhtlin nana thawktu pawimawh tak takte chu Sawrkar Department, a thawhpui Bank-te leh Progress Partner ni tura thlanchhuahte an nih thu a sawi a. Progress Partner ni tura thlan chhuah ten a hun taka loan an hmuh theih nana Bank-a thawktute inpekna chu fakawm a tih thu a sawi a. Mipui nena indawrtawnna hmun pawimawh tak a nih angin Bank-a thawktute chu dawr nuam, hmel hmuh nuam leh dawhtheihna nen, Bank dawrtute lo chhawn chhunzawm zel turin a fuih bawk a ni.

Khuallian chuan Bana Kaih Scheme hnuaia CM Special Package dawngtu zinga hma la tha thlanchhuah a nih tur thu leh chungte hnenah chuan lawmman buatsaih a nih tur thu a sawi a. March thla chhung hian Mizoram district tinah Bana Kiah Scheme Awareness Campaign buatsaih a nih tur thu a sawi bawk a. Mizoram Sawrkar Flagship Programme Bana Kaih Scheme hnuaia mawhphurhna neite chuan Mizoram tih hmasawnna kawngah chanvo pawimawh tak an chelh mek a ni tih hriain, kuthnathawktute, thiamna leh theihna neite dawmkanna kawngah, ram hmangaihna rilru nena thahnemngai taka thawk zel turin a fuih bawk a ni.

Pu Lalfakzuala, CEO (Handholding Scheme) tarlan danin Bana Kaih Scheme kaltlangin February ni 10, 2026 thleng khan chhungkaw 384 hnenah loan pekchhuah a ni tawh a, Cheng Vbc. 34.038 (Rs. 34,0389,928) a tling tawh a. Loan rul thate, an loan punna (Interest) hi Sawrkarin thla ruk danah a pek sak dawn a, thla ruk dana a punna hmasa ber Cheng Nuai 15.921 (Rs. 15,92,138) chu vawiin hian loan pe chhuaktu bank kutah pek a ni bawk a ni. Handholding Scheme CEO chuan Phase –I hnuaia loan hmu tur thlan tawhte bakah hian Phase-ii hnuaia loan hmu tur hi chhungkaw 147 thlan a nih leh tawh thu a sawi a. Vawiin thleng hian CM Special Package hnuaia Progress Partner thlanchhuah mi 2713 hnenah Cheng Vbc. 22.625 (Rs. 22,62,51,870) pekchhuah a ni a. Phase –II hnuaia chhungkaw 458 hnena pek tur Cheng Vbc. 2.289 (Rs. 2,28,93,500) chu vawiin hian tihchhuah a ni a. Phase –II kalpui leh hnu hian Progress Partner 917 thlan a nih tawh thu a tarlang bawk a ni.

Hun kaihruaitu Dr. Lalrinchhana, Principal Adviser chuan, Progress Partner ni tura dilna thehluh hnuah a changtu Department-a thawktuten uluk taka an endik dan te, a thlawn a sem a nih loh mai bakah tha taka loan rulh a tul thu te leh a rul thate chauh Sawrkarin loan pung a pek kir leh tur thu te a sawi a. Tanpuina an dawn hnua vil zui an nih mai bakah Progress Partner-te kutah mawhphurhna pawimawh tak tak dah a ni chu, Scheme dangte leh  Bana Kaih Scheme danglamna a nih thu a sawi. Lianchhiari Run Mini Theatre-a Bana Kaih Scheme hnuaia CM Special Package leh Loan Interest Subvention sem chhuahna hunah hian Bana Kaih Scheme hnuaia tanpuina dawngtute hlawhtlinna leh hmalakna video tawi thlir hona neih a ni a. Pu H.Lallianzuala, Member, MSPCC chuan lawmthu sawina hun a hmang bawk a ni.