4490/2025-2026

Dated Aizawl, the 16th February, 2026 : Vawiin khan Raising and Accelerating MSME Performance (RAMP) MZ4 Marketing Intervention hmalaknaa siam Mizo-te siamchhuah leh kutchhuak ngei thil chi hrang hrang zawrhna website MadeByMizo.com tlangzarhna inkhawm chu Lianchhiari Run Conference Hall, Treasury Square-ah neih a ni a. He hun hi Pu F. Rodingliana, Minister, Commerce & Industries Department chuan khuallian niin a hmanpui a. Pu J.K. Dawngzuala, Chairman, ZOHANDCO chu khualzahawm niin, Pu L.P. Lalchangkima, Managing Director, ZOHANDCO chuan hun a kaihruai a ni.

Minister Pu F. Rodingliana chuan website tlangzarhna inkhawmah hian thu sawiin, Mizote hi IT platform hmangin sumdawng ve tawh mahila, a leitu leh hralhtute tana platform rintlak, belhchian dawl erawh kan la neih loh thu a sawi a. Tunah chuan ram pawn lama leitute pawhin an rinngam theih tur khawpa e-commerce sumdawnna ruahman a ni ta hi lawmawm a tih thu a sawi a. Ramchhung thil siamchhuah leh tharchhuahte hralhna kawnga kan buaina ber thin chu hralhchhuahna tur market nena inzawmna (market linkage) a nih thu sawiin, chu harsatna chu sukiang turin Mizoram Sorkar Handholding Policy hnuaiah nasa takin hmalak mek zel a ni a, he website ruahman tak pawh hi Mizoram sawrkar hmalakna kal mek Handholding Policy nen a inhne rem thlap mai, a ti a.

Minister chuan MadeByMizo.com hi website satliah a ni lova, kan entrepreneur leh sumdawng mi, kutkawih thiamna nei leh loneitute tan kawngka hawnsaktu a nih thu a sawi a. He website hmang hian thingtlang kilkhawr ber bera product-te a mamawhtu tan kan pawt hnai dawn a, a siamchhuaktu te tan international market kan pawh hnai sak dawn a ni, a ti a. He e-Commerce platform puitlin a nih theih nana rim taka thawk a, nasa taka ngaihtuahna sengtute chungah lawmthu sawiin, kan product tha ber ber leh Mizote kutchhuak ngei chauh hralh tura dahchhuah zel anih theihnan tha thlah lovin tan la zel turin kalkhawmte a chah a ni.

Vawiin website tlangzarhna inkhawmah hian hun kaihruaitu Pu L.P. Lalchangkima chuan kalkhawmte lawmna thu a sawi a. Khualzahawm Pu J.K. Dawngzuala pawhin Mizote tana an thil siamte phochhuahna tur leh hralhna tur website tha tak siam a ni chu lawmawm a tih thu a sawi a. Pu Zodinpuia, Liaison Officer, RAMP chuan lawmthu sawiin hun a khar a ni.

MadeByMizo.com website hi Mizo thil siam hrang hrangte quality tha bik, mumal taka thlan chhuahte pholanna leh state pawn lam market-a thawn chhuahna platform a ni a. Mizo kutchhuak leh Mizoram raw material ngei hmanga thil siam chauh pholan a ni a. Raw material lakna, thil siamna hmun leh a siamtute chungchang chhui zui theih hi ngaih pawimawh a ni bawk a. Website- ah hian thil siamte chu category hrang hrang – ei leh in, thawmhnaw, hriselna kaihnawih, handicraft leh a dangte-a thliar hran an ni.

MadeByMizo.com hi open marketplace a ni lova, platform-a tel ve duh business-te tan Instagram-a madebymizo page-ah Direct Message a thawn theih a. Platform-a tel ve thei chinte tan chuan an thil siamte zawrhna tur zau zawk Mizoram pawn state dangte thlengin siamsak an ni dawn a. MadeByMizo Kiosk Bangalore, Kolkata leh Delhi-ah te din a ni dawn a, chutah chuan Mizo product thlan chhuahte chu pholan an ni ang.