Vawiin khan Lawngtlai DC Conference Hall-ah Lawngtlai Bawrhsap thar Dr Arun T., IAS hovin District Level Coordination Committee an thu khawm a. District hmasawnna tura hma lak dan tur hrang hrang an sawi ho.
He meeting-ah hian Lawngtlai khawpui chhunga office hrang hrang hotu lute kal khawmin, DC thar nen inhmelhriattirna hun hman a ni a. Lawngtlai DC Dr Arun T. chuan Lawngtlai District hmasawn nan department hrang hrangte chu an pawimawh vek thu leh thahnem ngai taka thawh ho a tul thu a sawi a. Lawngtlai chu hna thawhna hmun hrehawma ngai lo va, mahni hnaa chona thar anga ngai zawk turin officer kal khawmte chu a chah a. Hmasawnna hna thawhna kawngah amah finchhuah a, thurawn pe thin tura chahin, department hrang hrang hna thawh dan hriatna turin review meeting neih a nih thuai tur thu a sawi.
He hunah hian Lawngtlai District-in hma a sawn theih nana rawtna hrang hrang leh mipuite’n harsatna an tawh mek then khat sut kian dan tur te sawi ho a ni a. Lawngtlaiah internet chak zawk a awm theih nana District Administration lamin hma an lak mek dan te, Aadhaar enrolment-ah 78% tih a nih tawh thu leh zaa za ti tura theih tawp chhuah zel a nih thu te tarlan a ni bawk.
