Special Summary Revision of Electoral Rolls atana inbuatsaihna kal zelah vawiin chawhma khan Convention Centre, Lunglei-ah Assembly constituency 5 – Lunglei North, Lunglei South, Lunglei East, Lunglei West leh Thorang huamchhunga Booth Level Officers-te tan training buatsaih a ni. Booth Level Officer mi 98 zet kalkhawmin BLO hna thawh tur leh mawhphurhna hrang hrang an zir ho. 

Training programme kaihruaitu Pu James Lalnithanga, Election Officer, Lunglei District chuan training pe tura an inbuatsaih dan tlangpui sawifiahin Booth Level Officer kalkhawmte chu an mawhphurhna a san zia hre reng chunga taima tak leh hriatthiam tum tak taka zir turin a fuih a. Election Commission of India in ruamhmanna a siam angin nakum January 1st a kum 18 tling chin te Electoral Roll-ah an hming ziahluh tur a ni a, Booth Level Officer ten he Roll Revision hna kalpui dan tur an lo hriatchian hmasak theih nan Training hi buatsaih a ni, a ti. 

Vawiin training-ah hian District Level Master Trainer Dr Malsawmtluanga Fanchun, BDO Lunglei chuan ‘Legal Provisions and Structures for Roll Revision’ tih thupui hmangin kalkhawmte a ziritir a. Training-ah hian ERONet hnuaia Roll Revision kalpui dan tur te, form hrang hrang hman dan tur te, mipuite atanga document pawimawh lak khawm tur te leh inthlan kaihhnawih Dan pawimawhte zir ho a ni. 

Lunglei District chhunga South Tuipui Constituency hnuaia Booth Level Officer-te tan Hnathial SDO(C) in training a buatsaih dawn a, West Tuipui Constituency hnuaia Booth Level Officer-te tan Tlabung SDO(C) in training a buatsaih thung ang.