1387/2023-2024

2023 Thlazing ni 4: Lawngtlai Bawrhsap thar Pu H. Lalhmingthanga chuan vawiin khan Mizoram Journalists' Association (MJA), Lawngtlai District member-te chu a pisaa lengah sawmin, District hmasawnna atana hma lakna tur pawimawh hrang hrang a sawipui.

Lawngtlai Bawrhsap Pu H. Lalhmingthanga chuan chanchinbu mite chu sawrkar leh mipui inkara palai pawimawh tak, sawrkar ruahmanna hrang hrang puanzar kawnga kutke pawimawh an nih thu sawiin, District hmasawnna atana Lawngtlai District Administration an lo thawhpui tawh ṭhin anga ṭha taka thawhpui zel turin a sawm a. Lawngtlai District MJA te hma lakna chhuanawm tak tak a lo hriat ṭhin thu sawiin, an hna thawh ṭha chu chhunzawm zel turin a chah a. Lawngtlai District-a inrelbawlna chungchang leh hmabak awmte tar langin, ramin Inthlanpui a hmachhawn tur chungchangah leh kawng hrang hrangah District Administration thawhpui a, mipui rawngbawlna leh District hmasawnna hna thawh kawngah a ṭulna apianga amah finchhuah a, thurawn pe ṭhin turin District MJA member-te chu a chah a ni.

Bawrhsap leh District MJA member-te inkawm hona hunah hian Additional Deputy Commissioner Pu Abraham Beirazi Khithie leh District Information & Public Relations Officer Pu C. Lalhruaitluanga te pawh an tel a. District MJA te hi an President Pu Lalngheta Ralte chuan hovin, Bawrhsap hnenah hian District MJA Patron a nih hriattirna lehkha leh District MJA scarf an hlan nghal a ni.

District MJA hruaitute chuan DC thar chu Lawngtlai District-ah an lo lawm tih sawiin, District hmasawn nan thawhpui tura an inhuam reng thu an sawi a. District MJA hna thawh dan leh hma lakna tlangpui leh hmachhawp an neihte tar langin, District Administration leh District MJA te thawh hona kawnga rawtna an neihte DC hnenah hian an thlen a ni.