No.2097/2020-2020

Lawngtlai, Nikir thla ni 16, 2020: Lawngtlai District Deputy Commissioner (DC/Bawrhsap) thar Dr Andrew H. Vanlaldika, MCS chuan vawiin khan Pi Shashanka Ala, IAS hnen atanga charge lain Lawngtlai Bawrhsap hna a zawm fel a. Hna a zawm fel rualin Lawngtlai District MJA-te chu lengah sawmin, thingpui a inpui a, District hmasawn nana theih tawp chhuaha thawh hopuiah a sawm.

Dr Andrew H. Vanlaldika hi Lawngtlai District-a Lungzarhtum khaw chhuak a ni a. North-Eastern Hill University (NEHU) atangin Sociology-ah Doctor of Philosophy (PhD) a hmu a. Kum 2003 batch Mizoram Civil Service officer niin, DRDA Aizawl Project Director atangin Lawngtlai DC-ah hian lo sawn a ni.

Vawiina Lawngtlai District MJA te a kawmnaah hian Bawrhsap thar hi Addl DC Pu K. Laltlawmlova, SDO (Sadar) Pu V. Lalruatliana leh DIPRO Pu C. Lalhruaitluanga te'n an tawiawm a. District MJA te hi an President Pu Lalngheta Ralte chuan a ho ve thung a ni.

Bawrhsap thar chuan Lawngtlai District mipuite chibai bukin, hripui leng mek chu kan zavaia kan do tlan a ngai a, hmun thenkhatah khauh takin do ni mah se, hmun thenkhatah kan lo inthlahdul si chuan hri leng laka invenna hi awmze nei lovah a chhuak thei tih a sawi a. Mipuite chu khawlaia an chhuahvahnaah hmai tuam hram hram tur leh mi dang nena inhnaih chilh lutuk lo turin a chah.

Bawrhsap chuan ram hmasawn nana media mite pawimawhna sawiin, sawrkar khalh ngiltu leh mipui leh sawrkar inkar dawh zawmtu an ni tih a sawi a. District tana a thawhna kawngah amah leh a thawhpuite kaiza veng a, a tul anga finchhuah thin turin a ngen a. COVID-19 hri leng karah pawh District mipuite an him nana zirtir kawngah theih tawp chhuah turin a chah bawk.

Lawngtlai District MJA te chuan DC chu MJA Patron member atana an ruat thin thu sawiin, DC thar hi Patron-a ruat a nihna lehkha leh thuziak hunmawi an hlan a. District MJA President Pu Lalngheta Ralte chuan journalist-te chu ram kalphungah ban pawimawh tak 'fourth estate' tia sawi an nih thin laiin, sawrkar leh journalist-te inkarah thawh hona tha a awm si loh chuan ram inrelbawlna a kal ngil thei lo fo tih sawiin, Lawngtlai District hmasawn nan MJA te chuan sawrkar chu eng lai pawha thawhpui an inhuam thu a sawi.

Vawiina inkawm honaah hian COVID-19 hri leng kaihhnawih leh District hmasawnna tura thil pawimawh hrang hrangte sawi ho a ni.