No.2096/2020-2020

Lawngtlai, Nikir thla ni 16, 2020: Lawngtlai Bawrhsap thar Dr Andrew H. Vanlaldika, MCS chuan vawiin khan mawhphurhna la tanin, chawhnu lamah Lawngtlai khawpui chhunga quarantine centre hrang hrang a tlawh kual nghal a. He'ng centre-a mawhphurtute nen thil pawimawh hrang hrang an sawi ho.

Lawngtlai Bawrhsap thar hi Addl DC Pu K. Laltlawmlova, DRDA Project Director Pi Marilyn Rualzakhumthangi leh SDO (Sadar) Pu V. Lalruatliana bakah, Nodal Officer-te, DIPRO leh District MJA member-te'n an tawiawm a. Quarantine centre pali - DIET Thingkah, Govt Thingkah Middle School, ANM School leh Medical Quarters te tlawhin, Centre Supervisor leh Support Staff te'n an lo dawngsawng a. An enkawl centre dinhmun lo hrilhfiahin, an harsatna leh mamawh te a hnenah hian an lo thlen a. Bawrhsap chuan COVID-19 hri leng dona kawnga an thawh rimnaah fakin, thahnem ngai taka an mawhphurhna hlen tum turin a fuih.

Bawrhsap hian COVID-19 positive te enkawlna tura ruahman Dedicated Covid Health Centre (DCHC) leh Covid Care Centre (CCC) te tlawh bawkin, District Medical Superintendent Dr Zothanpari Chhakchhuak chuan centre nihphung leh inkaihhruai dan te a lo hrilhfiah a. Tuna Lawngtlai District-a positive case pali awm mekte chuan hriselna kawngah insawiselna an la neih lem loh avangin CCC-ah dah a, uluk taka vil reng an nih thu leh insawiselna deuh nei mi dang pawh CCC-ah chuan dah an nih thu a sawi a. DCHC chu positive case, taksaa harsatna nei nasa deuhte dahna tura ruahman a nih thu leh tun dinhmunah DCHC-a dah luh ngai an la neih loh thu a sawi bawk.

Tun dinhmunah Lawngtlai District chhungah hian inkhung hran nana hman lai government quarantine facility 13 leh Covid Care Centre 1 bakah, community quarantine facility 4 a awm mek a. He'ng facility hrang hrangah hian khung hran mek mi 666 awmin, home quarantine-a khung hran mek mi 41 nen an zavaiin Lawngtlai District chhungah khung hran mek mi 707 an awm.