No.5292/2020-2021

Lawngtlai, Mimkut thla ni 21, 2020: Lawngtlaia 71 RCC (Road Construction Company) Camp Quarantine Centre-ah Border Roads Organisation (BRO) mi leh sa COVID-19 positive mi 6 hmuh chhuah an nih avang leh mipuite him nan Lawngtlai District Magistrate Dr Andrew H. Vanlaldika, MCS chuan vawiin (21.09.2020) khan College Veng, Lawngtlaiah thu leh awm hma atana mipuite zawm tur khuahkhirhna thupek a chhuah.

He thupek hi chhuah a nih atanga thu leh awm hma chuan 71 RCC Camp, College Veng, Lawngtlaiah pawn lam mi tu mah luh phal a ni lo va, 71 RCC mi leh sate pawh phalna nei chauh lo chu pawn lama an chhuah leh veivah khap a ni.

71 RCC-a mite'n an ni tin mamawh pawn lam atanga lak luh a ngai a nih chuan bazar tur bik detailment leh routine siamin, ruat bikte chu ID card/badge an siamsak ang a, detailment leh routine copy chu Lawngtlai Deputy Commissioner leh College Veng VLTF te hnenah pein, an veivah phalsak a ni ang. Camp pawn lama chhuah phalsak an nih reng rengin tha takin COVID-19 protocol an zawm tur a ni a. He'ng chhuak tura ruat bikte hi quarantine centre-a awmte nen an inkal pawh phal a ni lo.

He thupek hian Lawngtlai DC-in phalna a pekte, medical duty-te, COVID-19 duty-te leh VLTF duty-te, print & electronic media mite chu a huam lo va. Tin, NH-54 kal tlang tur leh Chawnhu atanga Lawngtlai pana kal leh hawte pawh ding khawmuang lova an kal tlang phalsak an ni.

He thupek zawm lote chu The Mizoram (Containment and Prevention of COVID-19) Ordinance, 2020 hmanga hrem theih an ni ang.