No.5291/2020-2021

Dated Champhai, the 21st September, 2020: Mizoram State Health Care Scheme (MSHCS) leh Ayushman Bharat-Pradhan Mantri Jan Arogya Yojana (AB-PMJAY) a thara kalpui leh tur chungchangah vawiin khan I&PR Auditorium CHANEM-ah training buatsaih a ni.

He hun hi Dr.R.Lianmawia, CMO Champhai chuan kaihhruaiin, Health Care Scheme pawimawhna hre lo tam tak an awm thin thu leh a hun chhung a zawh tawh hnua tih thar leh tum an awm thin thu sawiin, hei hian mamawhtuteah harsatna a thlen tawh thin avangin tun tumah chuan mitinin he scheme hi ngaihpawimawha, an hriatchian theihna tura tan lak thar angaih thu a sawi a ni.

Dr.Zatluanga DMS pawhin thu sawiin, Health Department chuan chawl lova hmachhawp a neih zel thu sawiin, Health Department-a thawktu zawng zawngte chu hlawh la tur chauh a thawk lova, theihtawp chhuaha hna an thawh a tul thu a sawi a. Thenawm hnai ram thlengin an pan fo thin District Hospital Champhai chu ngaihpawimawh a tul thu a sawi a. A thara Health Care Scheme kalpui leh turah thawktute chu an bial chhunga a mi te inziahluh tir vek tum tura a chahin, a pawimawhna leh tangkaina chiang taka hriattir chu an hna pawimawh tak a nih thu a sawi a. District Hospital pantu te’n Golden Card emaw, Health Care Scheme hmanga hamthatna an dawn ngei theihna tura tan lak a ngaih thu a sawi bawk.

Dr.C.Lalthanpara, Resource Person hnen atangin Mizoram State Health Care Scheme chungchang ngaihthlak niin, natna thlanbik chauha hman theih chu nikuma ennawn leh a nih hnuah natna zawng zawng deuh thaw a huam tawh a, kum khatah cheng nuai 2 thleng a bill theih dawn a ni, a ti a. Tuna Health Care Scheme kal mek hun chhung chu tun thla September Ni 30, 2020 ah a tawp tawh dawn a, October Ni 1, 2020 atanga September 2021 chhung thleng huam tur Health Care Scheme chu thara kalpui leh tur a ni a, hemi atan hian October Ni 1, 2020 atanga December Ni 31, 2020 thlengin inziahluh hun hawn leh tur a nih thu a sawi bawk. Mizoram chhungah mai nilo Mizoram pawnah pawh hman theih a nih thu a tarlang bawk.

Resource Person hnen atang hian he scheme a thar a kalpui leh tur chungchanga hriattur pawimawh hrang hrangte leh tum danga an tih loh telh thar an neihte ngaihthlak niin zawhna leh chhanna hun hman chhunzawm a ni. Training-ah hian Champhai Main Centre leh Hnahlan PHC hnuaia ASHA, Health Worker, Medical Officer leh Supervisor-te an tel a ni.