No.3317/2020-2020

Lawngtlai, Vawkhniahzawn thla ni 21, 2020: Lawngtlai District chhunga Ngengpuitlang khaw mi, tun hnaia Bangladesh atanga ramri kana lo hawte chungchangah vawiin khan Lawngtlai Bawrhsap Dr Andrew H. Vanlaldika, MCS chuan Lawngtlaia chanchinbu mite kawmin, thil awm dan a hrilhfiah.

Ngengpuitlang khaw mi Pu Vanrunnuama nupui leh a fate pali, an zavaiin mi panga chu kumin January ni 23 khan Bangladesh-a Saizam khuaah chhungkaw thilah an zin a. Heta tang hian July ni 16 khan lo hawin, dan lova ramri kanin, Lawngtlai District-a Chhippui khua atangin maxi cab-in Ngengpuitlang an pan a. Ngengpuitlang an thlen hian VLTF te chuan an lo khung hrang nghal a ni. Hemi chungchangah hian nimin khan Lawngtlai Block Incident Commander Pu Lalremruata Sailo chuan Lawngtlai Police Station-ah FIR a theh lut tawh bawk.

Lawngtlai Bawrhsap chuan ramri kan phal a nih loh laia ramri kan an awm chungchangah India leh Bangladesh inrina veng himtu Border Security Force (BSF) hotute be pawp a, thil awm dan a  zawh fiah hnuah ramri chu khauh zawka veng turin a hriattir nghal thu a sawi a. A ruka ramri kantute chungah dan anga hremna lek a nih tur thu sawiin, COVID-19 kaihhnawihah erawh he'ng Bangladesh atanga lo hawte avang hian mipui tan chi-aina tur a awm lo tih a sawi.

Chief Medical Officer Dr Lalthlamuana chuan COVID-19 laka fimkhur thilah Ngengpuitlang khaw mi Pu Vanrunnuama te chhungkua mi paruk leh an chuanna maxi cab driver te chhungkua mi paruk, an zavaiin mi 12 chu anmahni inah khung hran nghal vek an nih thu leh an hriselna a that thu a sawi a. Tun kar ningani hian an sample laksak an nih tur thu sawiin, an chhui zuinaah Bangladesh-a an va zinna Saizam khua hi COVID-19 hri leng lakah an fihlim nia an hriat thu a sawi bawk.

Incident Commander Pu Lalremruata Sailo chuan he'ng Bangladesh atanga lo hawte hi an va zinna Saizam khua atangin ramri thlengin kilometre 150 kea an lo kal thu leh ramri-ah chhungkaw pa ber Pu Vanrunnuama'n maxi cab nena lo hmuakin, an khuaah a hruai haw tih a sawi a ni.

Attachment

  • Loading attachment...