No.3316/2020-2020

Lawngtlai, Vawkhniahzawn thla ni 21, 2020: Vawiin khan Lawngtlai District Task Force Immunisation (DTFI) chu Lawngtlai DC Conference Hall-ah Lawngtlai Additional Deputy Commissioner Pu K. Laltlawmlova, MCS hovin an thu khawm a. Lawngtlai District-ah kim taka hri danna pek a nih theih nan ruahmanna an siam.

District Immunisation Officer Dr S. Thaizi chuan Expanded Programme on Immunisation (EPI) hnuaia hma lakna hrang hrang a sawi fiah a. Zenghri dan beihpui thlak (pulse polio immunisation) hnuaiah kum tin January leh April thla inkarah naupang kum 5 hnuai lamte hnenah zenghri danna pek thin a nih thu sawiin, World Health Organisation (WHO) chuan kum 2014 March ni 27-ah India ram chu zenghri laka fihlim (polio free country)-ah a puang tawh tih a sawi a. Hri danna hmanga ven theih natna hrang hrang vanga thi an awm tawh loh nan Mission Indradhanush chu kum 2014 December ni 25-ah bul tan a nih thu leh kum 2019 December ni 2-ah ngawrh leh zual zawka hma la turin Intensified Mission Indradhanush bul tan a nih thu sawiin, hemi hnuaiah hian naupang kum 2 hnuai lam leh nu nau paite hnenah hri danna pek thin a nih thu a sawi.

Computer Assistant Pi N. Lalrinmawii'n powerpoint presentation hmangin EPI hnuaia Lawngtlai District dinhmun tlangpui a tar lang a. Lawngtlai District chhunga hri danna pek kawnga harsatna hrang hrang leh a chin fel dan turte sawi ho a nih hnuin Lawngtlai Chief Medical Officer Dr Lalthlamuana'n lawm thu sawiin, hun a khar a ni.

Kum 2019 December leh kum 2020 March thla inkar chhunga Intensified Mission Indradhanush round 4 kalpuiah naupang kum 2 hnuai lam hri danna pek tur target 2930 atangin 2782 hnenah hri danna pek niin, chu chu 94.9% a ni a; nu nau pai hri danna pek tur target 870 atangin 678 hnenah hri danna pek niin, chu chu 77.9% a ni thung. Kum 2019 April atanga kum 2020 March thla chhungin immunisation target 2211 awmah 1711 chu hri danna pek zawh (fully immunised) niin, 77.3% hlawhtling ang a ni a. Kum 2020-21 chhung atana target 2338 atangin thla thum (April-June) chhungin mi 403 chu hri danna pek zawh tawh an awm bawk.