No.3315/2020-2020

Tun hnaia Military leh Paramilitary Force zinga Covid-19 vei engemawzat Mizorama hmuhchhuah anih chungchang sawiho tur leh sipai ho zingah leh mipui nawlpui hnena he hri hi inkaidarh anih lohna tura Sipaite zawm tur inkaihhruaina ‘Standard Operating Procedure (SOP) for Military and Paramilitary Forces’ duang turin vawiin khan Lunglei DC Conference Hall-ah meeting neih a ni. 

Meeting-ah hian Lunglei HPC Vice Chairman Pu Lawmawma Tochhawng, Mizoram Bamboo Development Board Vice Chairman Dr K.Pachhunga, Lunglei DC Pu V.Lalsangliana, SP Pu Stephen Lalrinawma, CMO Dr Thani Pachuau leh official dangte leh Sub Hqrs YMA hruaitute bakah 1^st Assam Rifles, 60 Bn BSF, Dawngzawl Serchhip, 61 Bn BSF, Zotlang Lunglei, 131 Bn BSF, Melte, Lunglei, 42 WEU(C) Indian Air Force, Pukpui Lunglei te an tel a ni.

Lunglei South bialtu MLA leh Mizoram Bamboo Development Board Vice Chairman ni bawk Dr K.Pachhunga chuan sipaite zingah Covid-19 vei hmuhchhuah an awm belh zel chu pawi a tih thu a sawi a. Covid-19 hri a darh zel lohna tur leh mipui nawlpui zinga Covid-19 hripui inkaidarh a awm lohna turin sipai Commandant kal khawmte chu anmahni enkawl battalion-ah theuh fimkhur zual sauh tur leh discipline tha taka kengkawh tur leh an mi leh sa te zingah COVID-19 chungchanga hriattur tulte hrilha, uar zawka inzirtirna kalpui turin a hrilh a. An hmalaknate leh dinhmunte District Administration ah chip chiar taka report thin turin a chah bawk. Covid-19 hrileng avanga harsatna nasa tak tawh karah Lunglei District official-te theihtawp chhuaha Department hrang hrang tang hova mipuite tana an thawk chu fakawm a tih thu sawiin an inpekna leh thahnemngaihna avangin an chungah lawmthu a sawi a. Tlawmngai leh thawh hreh neilo VLTF-te kan nei hi kan vannei takzet a ni tiin an chungah lawmthu a sawi bawk.

Lunglei SP Pu Stephen Lalrinawma chuan tun dinhmunah Mizorama COVID-19 vei mek 129 zinga 99 (76.74%) chu sipai, Para-military force Mizorama awm mekte zing ami an ni tih sawiin BSF mi leh sa te Covid-19 an inkaidarh chungchangah FIR te pawh Lunglei Police Station-ah thehluh a awm tawh thu a sawi a. The Mizoram Containment and Prevention of Covid-19 Ordinance, 2020 behchhana an chunga action la turin Police lamin hmalak ngei an tum thu a sawi.

Meeting-ah hian Lunglei District-a sipai lo la luh belh tur chungchang te, quarantine kalpui mek dan leh chhunzawm zel dan tur te, Lunglei H&FW Department te nen hmalak ho dan tur chungchang te leh Sipaite zawm tur inkaihhruaina ‘Standard Operating Procedure (SOP) for Military and Paramilitary Forces’ chungchangte sawiho a ni. 

BSF - te hian tun atanga thla hnih chhunga Mizoramah Sipai 800 lo lut belh tura an beisei thu leh an zinga mi 300 vel chu Lunglei District rawn lut tur an nih thu 131 Bn BSF, Melte, Lunglei Commandant KS Nautiyal chuan a report a. Hen sipai rawn lut tur te hi BSF hmunhma neihten a dawl zawh dawnloh avangin Quarantine Facility ruahman pui turin sawrkar an ngen a. Lunglei DC Pu V. Lalsangliana chuan heng sipaite tan hian sawrkarin quarantine facility pahnih – JNV Pukpui leh Sazaikawn Multipurpose Indoor Hall ruahman theih a nih thu leh hemi bak chu anmahniin ruahmanna siam turin a hrilh a ni. 

1^st Assam Rifles atanga lo kal Major Ramandeep Makkar chuan tun atanga thla hnih chhungin sipai 30 aia tam lo an beisei thu leh an sipaite Assam Rifles Quarantine Centre Zokhawsangah ni 21 chhung khunghran zel niin Mizoram H&FW Department kaltlanga swab test neih thin a nih thu a report. 42 WEU(C) Indian Air Force, Pukpui hotute pawhin sipai 30 aia tam lo an beisei thu leh anmahni battalion headquarter-ah quarantine an kalpui thin thu an report.

Sipaite zawm tur inkaihhruaina ‘Standard Operating Procedure (SOP) for Military and Paramilitary Forces’ pharh niin sipaite chu tha takazawm tura hrilh an ni. ‘Standard Operating Procedure (SOP) for Military and Paramilitary Forces’ tlangpui chu a hnuaia tarlan ang hi a ni:

1. Sipai leh an chhungte Lunglei District lo lut tur an awm chuan Commandant emaw Officer-in-Charge in DC leh CMO te hnenah rang takin a hriattir lawk ngei ngei tur a ni. 
2. Sipai lo lut te chu District Administration in a pawm lawk Quarantine Centre-ah te chauh khunghran tur an ni.
3. Commandant emaw Officer-in-Charge te chuan CMO nen in rawnin Swab Sample lak a, test tur a ni.
4. Sipai khunghran te hriselna dinhmun chu a concern Battalion Medical Officer-ten uluk takin an vil tur a ni.
5. Khunghran te detail kimchang -  hming, kum, address, mobile number te chu lungleidc@gmail.com ah thawn thin tur a ni.
6. Khunghran te chu mCOVID-19 leh Aarogya Setu Mobile Application-ah te an in register vek tur a ni.
7. Ni 14 chhung khunghran tawh, swab sample test result negative bawk te chu Quarantine atanga thlah zalen theih an ni ang. Medical Officer in charge in Completion Certificate a pek hnuah chauh Quarantine Centre atanga chhuah phal sak an ni ang.
8. Quarantine atanga thlah zalen an nih hnu pawhin ni 7 dang chu fimkhur taka mahni battalion headquarter chhuahsan loh tur a ni.
9. Military and Paramilitary Forces sipaite chu loh theihloh thilah chuah vantlang hmunah te an chhuak tur a ni. 

Tun dinhmunah Lunglei District-ah Covid-19 positive enkawl mek mi 16 awmin an zavai hian BSF mi leh sa te vek an ni.