Lawngtlai Bawrhsap Pi Shashanka Ala, IAS chuan vawiin khan Lawngtlaia chanchinbu mite chu a office chamber-a lengah sawmin, District hma sawnna kawnga thawh ho dan tur a sawpui.

 Lawngtlai Bawrhsap Pi Shashanka Ala chuan chanchinbu mite chu sawrkar hma lakna puanzar kawngah leh mipuite zirtir kawnga an pawimawhzia hria a, theih tawp chhuaha tan la tura fuihin, Lawngtlai District hma sawnna atan thawh hopuiah a sawm a. District tana hna a thawhna kawngah a tul anga finchhuah zel tura chahin, VC Inthlan leh Lok Sabha Inthlanpui lo awm turah pawh inthlanna felfai leh thianghlim a awm theih nan an theihna zawna hma lo lakpui turin a sawm bawk.

 Lawngtlai District MJA te hi an President Pu ZD Dengngura'n hovin, Lawngtlai DC chu District MJA-a patron an nih zel thu sawiin, a hmaa mite an thawhpui thin ang bawkin tuna DC pawh District hma sawn nan thawhpui zel an tum thu an sawi a. District leh journalist-te hma sawnna tura rawtna an thlente chu Bawrhsap chuan a theih anga bawhzui a tum thu a lo hrilh a ni.

He inkawm khawmnaah hian Lawngtlai DIPRO Pu C. Lalhruaitluanga MIS pawh telin, inhmelhriatna thingpui an in ho nghal a. District hma sawn nana hma lakna tur hrang hrang an sawi ho a ni.