No.3735/2020-2021  

Lawngtlai, Thlazing ni 3, 2020: Vawiin khan Lawngtlai Bawrhsap, District Disaster Management Authority Chairman ni bawk Dr Andrew H. Vanlaldika, MCS chuan nizan hmasaa ruahsur avanga Lawngtlai Chandmary Venga Pu J. Lalkhuma te leh chhungkaw dang pathum kawmthlanga lei min chu a hmunah a enfiah.

Bawrhsap hi Lai Autonomous District Council (LADC)-a DM&R Nodal Officer Pu Thathluna Chinzah leh DIPRO Pu C. Lalhruaitluanga te'n an tawiawm a. Lei minna hmun hi Lawngtlai atanga Mampui panna kawng an, Chandmary huam chhunga Kanaan Veng a ni a. Kawng kama in ding tlar 4 chu an kawmthlanga lei tawlh hian an ek in a lak vek avangin inthiarna nei lovin an awm a. Bawrhsap chuan ek in chu siamsak dan ngaihtuah nghal a nih tur thu a sawi.

Lei tawlh hi pialtlep chung niin, in ding lai erawh khawih chet a nei lo niin in neitute chuan an sawi a. A tawlh tur ang chu a tawlh fai deuh vek tawh nia a lan avangin tun dinhmunah in ding lai tan chuan hlauhawm lutuk tawh lo tura ngaih a ni a. Nimin khan vengchhung hnatlangin then fai ngai zualpui thenfaipuiin, District Disaster Management Authority leh LADC DM&R atanga silpauline an pek te chu kawmthlangah hian zar nghal a ni.