No.2168/2020-2020

Lawngtlai, Nikir thla ni 18, 2020: Vawiin khan Lawngtlai Bawrhsap Dr Andrew H. Vanlaldika, MCS chuan Lawngtlai District-a COVID-19 positive case hmuh chhuah belh chungchangah Lawngtlaia thu thar theh darhtute a kawm.

Vawiina Bawrhsap pisaa thu thar theh darhtute nena inkawmnaah hian District Administration, Police leh Health Department hotute telin, ni 17.06.2020 zana Lawngtlai District-a COVID-19 positive case pali hmuh chhuah belh chungchang bakah, COVID-19 dona leh a laka invenna kawnga District dinhmun leh hma sawn a tulna lai te an sawi ho.

Bawrhsap Dr Andrew H. Vanlaldika chuan Lawngtlai District chhungah sawrkarin inkaihhruaina hrang hrang a siamte uluk taka zawm zel a nih avang leh positive pali hmuh chhuah belhte pawh tha taka khung hran sa an nih avangin mipui tan chi-ai phahna tur a awm lo tih a sawi a. Covid vanga damlote enkawl chungchangah leh hri dona kawngah sawrkarin a tih tur ang ang hlen chhuak turin theih tawp chhuah a nih tur thu a sawi. He hri laka him zel tur leh mipui vantlang zinga a darh loh nan kut sil fai, hmai tuam that, mi dang nena inhnaih chilh loh leh mimal hriselna vawn that kawngah mipuite chu fimkhur leh zual turin a chah nghal.

Sr Medical Officer Dr S. Thaizi chuan Lawngtlai District-a quarantine facility dinhmun leh khung hran mekte dinhmun bakah, sample test dan te a sawi fiah a. Medical team-in theih tawp chhuaha hma an lak dan a sawi fiah bawk.

Thu thar theh darhtute chuan an hriat duh hrang hrang leh mipuiin an hriat awm thil pawimawh an tihte an zawt a, hma lak chhoh zelna tura thu rawn an neihte an sawi bawk.

District thuneitute'n an tar lan danin, tun dinhmunah Lawngtlai District chhungah government quarantine facility 13 leh community quarantine facility 4 a awm mek a. Khung hran mek - government quarantine facility-ah 534, community quarantine facility-ah 96 leh home quarantine-ah 37, an zavaiin mi 667 an awm.

Vawiin thlengin Zoram Medical College (ZMC)-ah RT-PCR test turin swab sample 741 thawn a ni tawh a. Result hriat tawh 594 awmin, chu'ng zinga pariat (8) chu positive case a ni a, result nghah lai 147 a la awm.

Nizana Lawngtlai District-a positive hmuh chhuah tharte hi mipa pahnih leh hmeichhia pahnih, Delhi atanga lo haw vek niin, sawrkar quarantine facility-a khung hran lai an ni a. A hmaa positive pali awm sate nen Covid Care Centre-ah dah an ni a, an hriselna dinhmun vil reng niin, ngaihtuahawm lutuk an la awm lo.