No.1101/2020-2020

Lawngtlai, Tomir thla ni 15, 2020: Nimin leh vawiin khan Lawngtlai Bawrhsap Pi Shashanka Ala, IAS chuan Lawngtlai District chhim lama khaw hrang hrang tlawhin, COVID-19 hri leng dona kawnga an hma lak dan a en a, chhim lama India-Bangladesh ramri leh India-Myanmar ramri dinhmun a enfiah bawk.

Lawngtlai Bawrhsap hian nimin khan Nghalimlui, Longpuighat, Devasora North, Fulsora, Chhotaguisury-I, Damdep-I, Damdep-II, Damdep-III, Fultuli (Chhippui), Devasora South, Bandukbanga, Gobasury, Siminasora, Parva-I, Parva-II, Parva-III leh Parva-IV te a tlawh a. Parvaah zan riakin, vawiin khan Kawnkhua, Tuisentlang, Ngunling (Bedsury), Tuichawngtlang, Vathuampui, Chikhurlui leh Saibawh te a tlawh bawk. He'ng khuate a tlawhnaah hian Bawrhsap hi village level task force-te'n lo dawngsawngin, COVID-19 dona kawnga an hma lakna leh an harsatnate an lo hrilhfiah a. Khawtlang mamawh hrang hrangte a hnenah hian an lo thlen.

He'ng khua a tlawhnaah hian Bawrhsap chuan VLTF-te chu an mamawha an hman atan silpauline leh tanpuina pawisa fai bak, hmui tuamna (mask) a hlan hlawm a. A tlawh khuate'n an harsatna an lo thlente chu a theih anga chinfelsak dan a ngaihtuah tur thu sawiin, khaw thenkhata sikul, anganwadi centre, health centre leh supply kudam te chu an dinhmun enfiahin a tlawh bawk.

Lawngtlai District chhim tawp, Chakma Autonomous District Council (CADC) huam chhunga Siminasora khaw bula Reng tlangah hian India, Bangladesh leh Myanmar ram pathumte inrina (tri-junction border) a awm a. Indo-Bangladesh leh Indo-Myanmar ramrite veng him tur hian Assam Rifles leh Border Security Force te an awm a. Lawngtlai Bawrhsap hian he'ng sipai hmunte hi tlawhin, ramri dinhmun leh ven him hna an thawh dante a zawt fiah a. Sipai hotute chuan ramri chu uluk taka ven reng a nih thu leh lut leh chhuak an awm loh thu an lo hrilh a ni.