No.1102/2020-2020

Dated Serchhip, the 15th May, 2020: Vawiin hian Mizoram Flagship Programme, Socio Economic Development Programme hnuaia Agriculture Development Board Team 2 te chuan, an leader Pu H. Biakzaua, MLA, Agriculture Development Board Vice Chairman ni bawk hovin Serchhip an tlawh a, DC Meeting Hall ah district mi pawimawhte nena inkawm hona an neih bakah, media mite nena titi hona hun tawi te neiin, Zawlpui leh a chhehvela thlai chinna hmun te an tlawh bawk.

Chawhma lamah DC Confenrence Hall ah Bawrhsap Dr. Lalzirmawia Chhangte, IAS kaihhruaiin loneitu leh kuthnathawk pawl hruaitute, tlawmngaipawl aiawh te, media mite leh official pawimawh te nena inkawm hona buatsaih a ni a. He hunah hian Pu H. Biakzaua chuan; hripui vangin khawvelin harsatna a tawk a, ei leh bar dinhmun a tlahniam duai duai a, he hun harsaah hian Mizoramin kan mamawh ei tur tam zawk kan tharchhuah theih nana intichak tawna, loneitute harsatna te hriat sak tumin kan rawn kal a ni, a ti a. Mizoramin kum khatah buh 60,000 Metric Ton vel kan thar meka, kan kum khat mamawh erawh 1,80,000 MT vel a ni thunga, kan mamawh hmun thuma thena hmun khat vel chauh kan thar tihna a ni. Hetianga ding kan nih avang hian India ei bar harsatna lo thleng thei laka kan inven nan lo leh huan siam thei apiangten kan siam a tul a, tunah lo vah theih a nih tawh loh avangin Chul rih leh Kanghreng thlenga uar a ngai a ni, a ti. Tin, thlai chi lamah pawh intodelh tura tan lak thar a tul thu a tarlang a, loneitute hamthatna hrang hrang, a bikin PM Kisan leh Farmer Pension Scheme te chu nasa zawka hmang turin mipuite a ngen a ni. Pu H. Biakzaua hian District Task Force on Covid19 te hnenah tanpuina Rs. 5000 a hlan nghal a ni.

Board member dang lo tel Commissioner Lalkiamlova leh Pu Zion Lalremruata te pawhin thusawina an nei bawk a, Mizoten buh chu chaw bera kan neih a nih anga buh thar tam tura leilet leh thingtlang lamah pawh tan lak a tul thute, buh chu a pawisaa chhutin a man to lo mahse nitin chaw a nih vanga a hlutna a san thute sawiin, Mizoram chu tun hmaah chuan mahni ei khawp buh tharchhuak thin, chuvanga Mau tam, Thing tam leh tampuimitthi vawi tam tak lo paltlang tawh kan nih dan te ngaihthlak a ni.

He hunah hian Serchhip DAO Pu C. Lalnithanga chuan Serchhip dinhmun tlangpui report a pe a, tun dinhmunah WRC farmer chhungkaw 1960 ten leilet 3710 Ha a zau an siam mek thu sawiin, Hactares 2352 bik hi buh chinna a nih thu a sawi a, leilet siam theihna ram awl 1357 Ha zeta zau district chhungah a la awm thute a sawi a. Tin, kuminah hian lo atana ram theh 5431 Ha a nih thu leh chung lovah te chuan SEDP leh FOCUS hmalakna tea Vaimim, Behliang leh thlai dangte chin an nih tur thu a tarlang a ni. Thlai chi nasa taka sem chhuah mek a nih thute, leilet neitute hnenah Chinai thi pek vek an nih tur tute a tarlan bakah tuikawng siam that ngai engemawzat a awm thute a tarlang bawk. Pi M. Vanlalzami, DHO pawhin kumin atana thlai chi an inbuatsaihna a sawi fiah bawk.

Tin, loneitu aiawh leh tlawmngaipawl aiawhte pawhin an harsatna leh tha nia an hriat te an sawi ve bawk a ni.

Inkawmna kaihruaitu Dr. Lalzirmawia Chhangte, IAS chuan, ei leh bara nasa zawka tharchhuah kan neih theih nana hmalakna kal mek leh chumi kal zela Agriculture Development Board Team ten Serchhip an rawn tlawh chu lawmawm a tih thu a sawi a. Heng hmalakna te hian rah duhawm tak a chhuah ngei a beisei thu a sawi a, he hun atana sawmna ngaipawimawha tel zawng zawng te chungah lawmthu a sawi bawk.

Inkawm hona neih zawh hian Media mite nena inkawm hona hun tawite buatsaih zui a ni a, chumi zawhah Team te hian Zawlpui leh a chhehvela thlai chinna hmun hrang hrang te an tlawh nghal a ni.