No.4930/2020-2021

Lawngtlai, Mimkut thla ni 10, 2020: District Hospital Lawngtlai TrueNAT Laboratory thar chu vawiin khan Lawngtlai Bawrhsap Dr Andrew H. Vanlaldika, MCS chuan tlawhin, a enfiah.

Bawrhsap hi SDO (Sadar) Pu V. Lalruatliana, MCS leh Central YLA hruaitute'n tawiawmin, District Medical Superintendent Dr Zothanpari Chhakchhuak chuan a lo dawngsawng a, laboratory-a sample test an kalpui dan leh a chhunga khawl awm hrang hrang hna thawh dan te a lo hrilhfiah a ni.

Bawrhsap chuan District dang laboratory nena khaikhin pawha chhuanawm tak tur an buatsaih thei leh Mizoram district hrang hrang zinga hmang hmasa pawl an ni thei chu District Hospital thuneitute inpekna leh thawh rimna rah a ni tih sawiin, lawmpuina a hlan rualin lawm thu a hrilh nghal a. COVID-19 hri kai leh kai loh enfiah tura hmun danga thawn ngai tawh lo tur chu District tan thil lawmawm leh chhinchhiah tlak tak a nih thu sawiin, COVID-19 kian hnuah pawh TrueNAT khawl chu natna dang en nan a la hman theih leh zel tur chu District tan hriselna kawnga hmasawnna mellung pawimawh tak nia a hriat thu a sawi.

DHL TrueNAT Laboratory hi OPD building hnuaiah bun niin, COVID-19 test nana him tawk tura ruahman leh buatsaih a ni a. Hman a nih hmain mi thiamte endikna pal tlang vekin, a endiktute paw'n hmun danga laboratory tam tak aia tha an tih zawk thu an sawi nghe nghe a. Test kalpui dan pawh COVID-19 laka him tura fimkhurna dan hrang hrang zawm chunga kalpui tura ruahman a ni.

DHL TrueNAT khawl hi September ni 7, 2020 (Thawhtanni) khan COVID-19 endik nan hman tan niin, tun thleng hian sample 10 endik a ni tawh a. Endik tawh chin hi a la negative vek a ni.