1766/2025-2026

Lawngtlai, 7th October 2025: Vawiin khan Pu Donny Lalruatsanga, Lawngtlai Bawrhsap chuan Goods and Services Tax (GST 2.0) chungchangah chanchinbu mite kawmna a Office Chamber-ah a nei a. Pu Lalnithanga Pachuau, Dy Commissioner, of State Tax leh a thawhpui ten Bawrhsap hi an tawiawm a ni.

Pu Donny Lalruatsanga chuan GST 2.0 hrechiang tura press meet- koh a nih thu a sawi a. A bik takin sumdawngte leh mipuite tan a pawimawh hle tiin, 'rate' thar chungchanga hriat ngaite hriat pawh a tul hle a ti. Chhiah (Tax) tha taka pek hi sumdawngte mawhphurhna a ni tiin, tha taka chhiah pe thin turin a chah a. Bawrhsap chuan Goods and Services Act 2017, rules 18- in a tarlan angin, sumdawng tu pawh GST pek ngaite chuan GST Identification Number (GSTIN) an tarlang tur a ni a, hemi bakah Section 31- in a phut angin, thil lei leh hralh kawngah 'invoice' an pechhuak ngei ngei tur a ni, a ti . Dan zawm lote chu Section 122 leh 125 of GST Act,2017 hmanga hrem theih an nih thu a tarlangin, khauh taka kalpui a nih tur thu a sawi bawk.

Bawrhsap chuan GST 2.0 - ah 'rate' thar hman a nih angin; thil man pawh a tlawm nasa em em a, hemi avang hian thil lei leh hralh kawngah sum leng vak pawh a that a beisei thu a sawi a. Mipuiten tun hmaa an lei phak loha an ngaih pawh an lei thei tawh dawn a ni, a ti. Pu Donny Lalruatsanga chuan Taxation Department - ten theihtawpa chhiah an khawn thinna fakawm a tih thu tarlangin, hma lam hunah pawh tha hnem ngai taka thawk turin a chah a. A bik takin MJA,Lawngtlai chu mipuite hnena 'rate' thar puanzar kawngah theihtawp chhuahpui turin a sawm nghal a ni.