Citizenship Amendment Bill, 2016 duh loh lantirna kal zelah Lawngtlai District-a tlawmngai pawl lian ber Central Young Lai Association (CYLA)-in Mizoram hmun danga NGO Co-ordination Committee hma lakna thlawpa Lawngtlai District-a kum 2019 India Republic Day lawmna boycott an tum chungchangah vawiin khan Lawngtlai Bawrhsap Pu N. Chakhai MCS chuan a office chamber-ah CYLA hruaitute a kawm.

He hunah hian Lawngtlai SP Pu Amit Goel IPS, Addl DC Dr Andrew H. Vanlaldika MCS, DRDA Project Director Pu R. Lalremsanga MCS leh DIPRO Pu C. Lalhruaitluanga MIS te'n Bawrhsap hi tawiawmin, Central YLA hruaitute hi an President Pu J. Sangthangpuia'n a ho va. Bawrhsap chuan India Republic Day chu India ram mipui zawng zawng tan ni pawimawh bik a nih avangin a lawmna boycott an tum chu thulh hram turin CYLA hruaitute hi a ngen a. CYLA hruaitute chuan Citizenship Amendment Bill chu Mizo hnam tana thil pawi thei a nih avang leh, a bik takin Lawngtlai District chu a tuar nasa ber tur a nih avanga dodal an nih thu sawiin, an duh lohzia lantir nana Republic Day lawmna boycott an tum chu tih tlang a tulzia hriat thiampui turin Bawrhsap chu an ngen ve thung a ni.

Ruahman lawk anga Central YLA khelmuala ropui taka India Republic Day lawm chu a rem dawn tak loh avangin DC office tualah hnam puanzar pawh pharh a, chibai buk tal chu phalsak turin CYLA hruaitute hi ngen chhunzawm an ni a. Ngunthluk taka an ngaihtuah ho hnuah, Republic Day lawm ni lovin, a ni serhna atan sawrkar office leh quarters-a India hnam puanzar zar leh, Bawrhsap hova DC office tuala hnam puanzar pawh pharh leh chibai buk ringawt chu CYLA lam atanga dodalna awm lova tih tlang theih turin an inbe rem ta a ni.