Vawiin khan Mizoram Polytechnic Lunglei (MPL) Seminar Hall-ah Mizoram Journalists Association (MJA), Lunglei District Annual Conference 2019 hman a ni a. Pu Lawmawma Tochhawng, Lunglei HPC Vice Chairman chuan khuallian niin a hmanpui a. MJA Lunglei District te tana Press Card a tlangzarh nghal a ni.

He hun Pu Lalrintluanga Khiangte, Lunglei MJA Vice President kaihhruaiah khuallian Pu Lawmawma Tochhawng chuan MJA Lunglei District-in Annual Conference 2019 an hmang chu duhsakna hlanin mipui rorelna sawrkar democracy ah executive, legislature leh judiciary te bakah Journalist te chu 'The Fourth Estate' tih hiala koh an ni a, ram hmasawnna mawhphurtu pawimawh berte zing ami an ni, a ti a. Sawrkar hmalakna hrang hrang puanzar kawngah leh Sawrkar finchhuah kawngah media mi te chu kawng tinrenga thawhho pui a duh thu sawiin Lunglei High Powered Committee (HPC) leh Lunglei MJA ten kum tam tak kalta atanga thawhhona tha tak an lo neih tawh chu chhawmnung zel turin kalkhawmte tanrual puiah a sawm a. HPC sum kaltlanga ei leh bar kawnga intodelhna leh mipuite tana eizawnna ngelnghet siam sak a duh thu pawh sawiin a hmalak zel naah thurawn pe fo thin turin journalist te chu a sawm a ni.

Pu H. Lalthansanga, President MJA Lunglei pawhin thu sawiin, hun rei tak Lunglei Journalist Association (LJA) angin kan kal thin a, hun harsa leh khirh tak tak te tawk thin mah ila, Kum 2006, Dec. ni 1-ah LJA atangin MJA-ah kan lut a, kum 13 kaltaa MJA-a kan inchhunglut kha han ngaihtuah kir hian inchhirna tur a awm lo va, hma kan sawn zel a ni. Hetih lai hian he pawl hi mi pangngai taka min lantirtu a ni a, zahawmna min pe a, thiltitheia min siamtu a ni a, chuvang chuan he pawl hian eng nge min tihsak theih ti lovin,  he pawl hi eng nge kan tihsak theih ang tih rilru kan put zawk a ngai a ni tiin, Journalist te hian The Fourth Estate kan nihna hriain kan hmanruate i tathriam zel ang u, a ti.

He hunah hian Pi C. Lalremruati, Lunglei DIPRO, Pu R. Lalnunthara, Adviser leh Pu K. Lalawmpui Adviser te bakah Pu C. Lalbuatsaiha, President MJA Hnahthial Sub Division te pawhin thu an sawi bawk. He hunah hian MJA member atan mi pathum, CS. Chawngchhuma, Editor Hnamdamna, Lalhmachhuana Ralte, Editor Lawhleng, C. Lalremruata, Editor Lungsen Post te chu Pu H. Lalthansanga, President MJA Lunglei District chuan lawmlutin, Press Card a awrh tir nghal a ni.

MJA Lunglei District hian General Meeting neih chhunzawm nghalin, Resolution pathum an  pass bawk. Chungte chu:

1. Lunglei District MJA ngenna ngai pawimawha MJA Gen. Hqrs.-in convention a neih thin palzutin block level atanga MJA member min lakluh sak avangin MJA Gen. Hqrs. chungah lawmthu kan sawi.

2. Lunglei District hmasawnna atana pawimawh tur Kawrpuichhuah Border Trade a puitlin thuai theihna turin Mizoram sawrkarin chak takin hma min laksak rawh se.

3. Lunglei khawpui Traffic tawt lutuk tih ziaawmna turin Lunglei By-pass road sawrkarin min siamsak thuai rawh se.