No.820/2020-2021

COVID-19 laka him nana Mizorama ni 04.05.2020 atanga ni 17.05.2020 chhunga inkharkhip thawh thumna kalpui turah Lawngtlai Bawrhsap Pi Shashanka Ala, IAS chuan nimin khan Lawngtlai District chhunga lirthei leh mihring veivah chungchanga mipuite hriat tur leh zawm tur a hnuaia mi ang hian hriattirna a chhuah.

1. Tul bik thila phalna pekte tan lo chuan inter-state-a zin leh veivah khap tlat a ni.

2. Tul bik thil, he'ng - chhiat tawh, damloh leh ei zawnna thil pawimawh bik a nih loh chuan zin veivah loh tur.

3. Ram chhungah bungraw phur motor tlan phal a ni. Mizoram chhung bika bungraw phur leh thiarte tan phalna hranpa lak a ngai lo vang.

4. Khaw kar kawnga passenger phur lirthei (commercial passenger vehicle)-te tlan phalsak an ni ang. He'ng lirtheite hi registration number 'odd-even' angin an intlan chhawk ang. Odd number (registration number tawpa 1, 3, 5, 7 & 9 awm) lirtheite chu Thawhtanni, Nilaini leh Zirtawpniah an tlan ang a. Even number (registration number tawpa 0, 2, 4, 6 & 8 awm) lirtheite chu Thawhlehni, Ningani leh Inrinniah an tlan thung ang. Pathianniah chuan tlan phal a ni lo vang. Passenger phurh theih zat pangngai (seating capacity) atanga a zatve (50%) chauh an phur thei ang. Mizoram chhunga zin turte hian an awmna veng VLTF hnen atangin phalna an la hmasa tur a ni. Phalna neite chauh ticket pek chhuah tur a ni.

5. Khaw chhunga service bus, taxi leh auto rickshaw te chu a chunga tar lan ang khian 'odd-even' angin ni tin an intlan chhawk ang. Passenger phurh theih zat pangngai atanga a zatve (50%) chauh an phur thei ang. He'ng lirthei (commercial passenger vehicle)-a chuangte hian hmui tuamna (face mask) an vuah vek tur a ni a. Lirthei khalhtute hian passenger-te hman tur hand sanitizer an pai reng tur a ni.

6. Tul bik thila private motor tlante pawh 'odd-even' angin, a chunga tar lan ang khian an tlan ang. Phalna nei bik tan chauh chhuah phal a ni.

7. Intlan chhawk hian duty nana hman sawrkar hna thawkte motor, LLTF/VLTF duty-te lirthei, ambulance leh medical emergency-a hman motor, print & electronic media mite motor, bawlhhlawh paih motor, bawnghnute phurh/semna motor te a huam lo vang.

8. State pawn atanga bungraw lak luh theih zingah ni tin mamawh (essential commodities) chu phalna hranpa lak ngai lovin lak luh theih a ni ang. Amaherawhchu, mCOVID-19 mobile application-a mPass hmangin declaration an theh lut ngei ngei tur a ni.

9. Ni tin mamawh ni lo, bungraw dang (non-essential commodities) la lut turte erawh chuan mCOVID-19 mobile application-a mPass hmangin Home Department phalna an la hmasa tur a ni.