No.822/2020-2021

COVID-19 laka him nana Mizorama ni 04.05.2020 atanga ni 17.05.2020 chhunga inkharkhip thawh thumna kalpui turah Lawngtlai Bawrhsap Pi Shashanka Ala, IAS chuan nimin khan Lawngtlai District chhunga zirna in, mipui pun khawmna leh dawr hawn leh khar chungchanga hriat tur leh zawm tur a hnuaia mi ang hian hriattirna a chhuah.

1. Zirna in, training institute leh sakhaw biakna hmunte chu khar chhunzawm zel a ni ang. Amaherawhchu, hei hian administrative office hna pangngai kalpui erawh a huam lo vang.
2. Mipui pun khawmna, he'ng - inneih lawmna (reception), lungphun, anniversary leh birthday lawmna, games & sports, book release, politics leh pawl thila kal khawmna, intihhlimna ang chi reng reng te chu he hun chhung hian huaihawt phal a ni lo.
3. Inneih inkhawm leh mitthi vuinaah mi 20 aia tam pun khawm khap a ni.
4. Dawr, sumdawnna hmun leh ei zawnna kawnga hma lakna te chu social distancing zawm chungin kalpui tur a ni.
5. Khawpui chhung bikah, hmun lun lai/dawr kawna dawr inthenawmte chu ni khat kar danah an inhawn chhawk ang. A ni zawnin dawr pakhat inhawn phal a ni lo. Dawr inthenawmte ni khatah a rualin inhawn phal a ni lo. Hei hian mihring leh ran damdawi zawrhna leh clinic te a huam lo vang. Dawr inhawn chhawk dan tur chu dawr awmna veng/khua VLTF te'n ruahmanna an siam ang a, an ruahmanna siam chu DC office an hriattir ngei tur a ni.
6. Dawr zawng zawng (damdawi dawr tiam lovin) tlai dar 5:00-ah khar vek tur a ni.
7. Bazar, dawr leh hmun danga kal tur reng reng chuan face mask emaw, hmanraw dang emaw hmangin an hmai an tuam ngei ngei tur a ni. Mi 3 aia tamin dawr pakhat an nghak tur a ni lo. Dawr nghaktute'n face mask an hmang ngei ngei tur a ni. Dawr neitute'n anmahni dawrtute dinna tur fit ruk (6) kar danah an rin lawk tur a ni. Dawr chhungah pawh fit 6-a inhlatin an awm tur a ni.
8. Public park, picnic spot, movie theatre, gym, spa, beauty parlour, barber shop, community hall, bazarpui, shopping complex, mall leh intawllenna hmun zawng zawng chu khar chhunzawm tur a ni.
9. Restaurant hawn phal a ni lo va, home delivery erawh phal a ni ang.