No.2400/2020-2020

Lawngtlai, Nikir thla ni 24, 2020: Vawiin khan Lawngtlai Bawrhsap Dr Andrew H. Vanlaldika, MCS chuan MJA Lawngtlai District member-te chu a pisaa lengah sawmin, All India Radio Regional News Unit-in India ram puma chawlhkar khat (June 13-19, 2020) chhunga COVID-19 kaihhnawih news nei tha an thlan chhuah pali zinga District MJA President, AIR Correspondent ni bawk Pu Lalngheta Ralte a tel lawmpuina hun a hmanpui.

Bawrhsap chuan chanchinbu mite chu hri dona kawngah an tangkai tak zet tih sawiin, theih tawp chhuah zui turin a sawm a. India ram kilkhawr Mizoramah pawh District kilkhawr ber, Lawngtlai District-in India ram puma lang pha journalist a nei thei chu lawmawm a tih thu leh District tihmingthatu a nih thu sawiin, Lawngtlaia chanchinbu mite chu tam lo mah se, an thawk rim hle tih a lantir thu a sawi a. AIR Correspondent Pu Lalngheta Ralte chu lawmpuina chibai a buk.

District Information & Public Relations Officer Pu C. Lalhruaitluanga pawhin thu sawiin, India rama AIR Correspondent 520 chuang zingah Lawngtlai District-a AIR Correspondent-in lawmman a dawng thei chu hlawhtlinna ropui tak leh District MJA tan pawh chawimawina tling nia a hriat thu a sawi.

Vawiina Lawngtlai Bawrhsap leh District MJA te inkawm khawmnaah hian district hma sawn nana thawh hona tha neih dan tur kawng hrang hrang sawi ho a ni a. Lawngtlai District MJA te'n District MJA Pension & Welfare Rules, 2020 an duan mek chu an Patron, Lawngtlai Bawrhsap ho hian thlir ho nghal a ni a. He Pension & Welfare Rules hi July ni 1, 2020 atanga hman tan theih tura peih fel tum a ni.

Attachment

  • Loading attachment...