1077/2025-2026
Lawngtlai the, 5th July, 2025: Nimin chawhnu dar 1:00 PM khan  'Nasha Mukt Bharat Abhiyan ( Drug Free India Campaign ) hnuaia hmalakna pakhat   Lawngtlai District Football Hmasawnna Kailawn khuhhawnna chu Lawngtlai District Football Association ( LDFA) bultumin CYLA Playground, Chandmary- ah neih a ni a. Pu Cheemala Siva Gopal Reddy IAS, Deputy Commissioner, Lawngtlai chuan khuallian niin khuhhawnna hi  a nei.

Pu Cheemala Siva Gopal Reddy, chuan Official, LDFA hruaitu, Zirtirtu leh zirlai naupang kalkhawmte hnena lawm thu sawina a nei hmasa a.  LDFA hruaituten ruahmanna tha tak an siam chu  lawmawm tiin, football-  ah Lawngtlai District-  in hmasawnna a neih ngei a beisei thu a tarlang a. Bawrhsap chuan  hunawl ngah lutuk avangin mi tam takin ruihhlo an khawih thin tih tarlangin, Ruihhlo laka fihlim turin taksa sawi zawi leh infiamna lam uar turin a sawm.  Infiamna hian rilru leh taksa hrisel pein, nun a tinuam em em a, mitin  uar deuh deuh a pawimawh hle a ti. A  bik takin football chu  mite hriat hlawh theihna tha tak  nih thu sawiin bawrhsap chuan  Lawngtlai atanga India  National Team - a tel phak an awm ngei theih nan a theihtawp chhuah turin a chah bawk.

Khuallian chuan Lawngtlai district- a chengte chu   Infiamna hmanga  ruihhlo  hneh tura chahin, ruihhlo  ti lo tura  chhungkua, khawtlang leh Lawngtlai mipuite  theihtawp chhuah turin a fuih a. Lawngtlai district  chu  Ruihhlo awmlohna hmuna siam tur leh Lawngtlai khawpui  chu 'Sport Capital of Mizoram' a siam turin kalkhawmte chu intamna (Pledge) a neih tir bawk a.  Lawngtlai District atanga Infiammite zingah  National Level- a  kal  an awm ve ngei a duh thu sawiin bawrhsap chuan vawiin  hun hman hian hmalam hun zel ah Lawngtlai District tan infiamna lamah hmasawnna rah tha tak a chhuah ngei  theih nan duhsakna a hlan a ni. 

Pu Joseph Lalhmingthanga Chinzah,  Honorary Secretary, LDFA chuan report pe in, Lawngtlai District Football Hmasawnna Kailawn hi 'Nasha Mukt Bharat Abhyan' hnuaia Ruihhlo Do kaltlanga sponsorship a ni  a ti, a.He  programme - in a tum ber chu Lawngtlaia  football ngaina tute kum 6 atanga senior ber thlengin mumal leh awmze nei zawk a football an  khelh a,  eizawnna tlak leh hna hmuh nan te, zirna tha zawkah admission an hmuh theihna tur kawng a lo nih theih nan he programme hi duan a ni , a ti a.  LDFA hmalakna hrang hrang leh hmachhawp hrang hrang te  tarlanna a nei nghal bawk.

Lawngtlai District Football Hmasawnna Kailawn khuhhawnnaah hian Pu Lallianchama, Treasurer LDFA chuan hunserh hmangin, Pu C. Hrangthianga, President, LDFA chuan inkhawm hi a kaihruai a. South Zone  (DC Team) leh North Zone (S&YO, LADC Team) atanga player thlanchhuah ten 'Exhibition Match'  an khel nghal  bawk a ni.