Tunlai hian Mizoram lui hrang hrangah inthlah pung turin sangha a fuan tan leh tawh a. He'ng nghafuante hi mi tam takin vengin an man a, hei hian sangha a tichereuvin an inthlah pung tur a tithuanawp nasa hle thin. Chuti a nih avang chuan Lawngtlai District Magistrate & Bawrhsap Pu N. Chakhai MCS chuan CrPC 1973 (Act II of 1973) section 144-na tlawh chhanin Lawngtlai District huam chhunga sangha fuanna lui reng reng khawih leh sawisak khapna thupek leh nghafuan man khapna thupek a chhuah.

He khapna thupek hi November ni 16, 2018 khan chhuah niin, chhuah a nih atanga thla hnih (2) chhung a huam dawn a. A zawm lo leh bawhchhia an awm chuan IPC section 188-na hmanga hrem an ni ang.