No.6100/2020-2021

Lawngtlai, Khuangchawi thla ni 14, 2020: Nimin khan Lawngtlai Bawrhsap Dr Andrew H. Vanlaldika chuan Lawngtlai leh Lunglei inkar National Highway-54 (NH-54) kawngpui laih zau hna thawh mek chu Lawngtlai atanga Thualthu bul thlengin a enfiah a. SDO (Sadar) Pu V. Lalruatliana bakah, MJA Lawngtlai District te'n an President hovin Bawrhsap hi an tawiawm a ni.

NH-54 kawngpui laih zau hna thawh mekah hian Thualthu atanga Lawngtlaia 71 RCC Camp thleng, KM 45-a thui chu Package 6-na niin, ABCI te'n an thawk a. An hnuaiah hian contractor pathum leh sub-contractor sawm awmin, tun dinhmunah hna thawh tura ruahman chin za zela 6.57 (6.57%) thawh zawh tawh a ni.

Lawngtlai Bawrhsap chuan cheng vaibelchhe 546.05 senna tur Pakage 6 huam chhunga hna thawhte chu chak zawk leh tha zawka thawk turin Company hotute chu hrilhin, khualzinte leh bungraw phur lirtheite'n harsatna an tawk thin chu tihziaawm a nih theih nan chak zawka hma la turin a chah a. Company hotute chuan theih tawp chhuah nghal an tum thu sawiin, fur ruahtui tla vanga harsatna an tawh fo thu leh a theih hram chuan kawng chhe zual lai chu chhun khaw en laiin khualzinte'n pal tlang thei se an duh thu Lawngtlai DC hnenah hian an lo sawi a ni.

Lawngtlai DC chuan Lawngtlai khawpui chhung kawng chhia avanga mipuite'n harsatna an tawh nasat thu sawiin, fur ruahtui tla a reh chhoh tan avangin hna hmasaah Lawngtlai khawpui chhung chu neih a, blacktop thuai turin a hrilh a. Company hotute chuan khuain a zir a nih chuan November thla hian Lawngtlai khawpui chhung kawngpui chu an khawih hman an beisei thu an sawi.