1663/2022-2023

Thlazing ni 19, 2022: Nimin khan Lawngtlai Bawrhsap Pu Amol Srivastava chuan hleilenna chi hrang hrang tuar hmeichhiate inhumhim nana an tluk luh lailawkna hmun One Stop Centre (OSC), Lawngtlai Bazar Venga mi chu tlawhin, thawktute nen inkawm hona hun an hmang a. Lawngtlai College Venga One Stop Centre building thar sak mek chu a hmunah kalin a enfiah bawk.

Bawrhsap hi Additional Deputy Commissioner Pu James Miahlung, DIPRO Pu C. Lalhruaitluanga leh UD&PA Civil Engineer Pu Robin Vanlalhrina te'n an ṭawiawm a. Thawktute'n lo dawngsawngin, an dinhmun leh mamawhte Bawrhsap hnenah hian an lo thlen a. Hmeichhiate himna atana hma lak zel dan tur te sawi hovin, OSC building thar sak mek chu a hmunah kalin an en nghal a ni.

OSC building thar sak mek hi peih fel ṭep a ni tawh a. Bawrhsap hian a saka duhthusam tawk lo lai siam ṭhat tur te, luah luh hmaa chul mam leh tuaihnum ngai lai te a enfiah a ni.

One Stop Centre hi hleilenna chi hrang hrang tuar hmeichhiate'n vanduaina emaw, an sut kian zawh loh harsatna an tawh emawa an tluk luhna leh inhumhim lailawkna tura din a ni a. Rikrum thila ṭanpuina pek te, an hliam enkawlsak te, dan hnuaia an dikna chanvo an hmuh theih nana ṭanpui te, an rilru hahdamna tura kawm te, riahna tur leh ei tur lo buatsaihsak hna te an thawk ṭhin a. Chu'ng kawng hrang hranga ṭanpui tur chuan Lawngtlai OSC-ah hian thawktu mi 9 an awm a. Ṭum khata mi panga thleng awm theihna tur niin, mi pakhat hi ni nga leh zan nga chhung an awm thei a, chumi hnua pan tur dang an hriat loh chuan hun rei zawk awm theihna home dangah an awm zui theih dan tur ngaihtuahsak ṭhin an ni.

Attachment

  • Loading attachment...