1662/2022-2023
Aizawl the 19th August, 2022 : Vawiin khan Sports & Youth Services Minister Pu Robert Romawia Royte chu Institute of Advanced Studies in Education (IASE)-a Thanks Giving and Felicitation of University Rank Holders-ah khuallian a ni a, he hun hi a hmanpui a ni.

Minister Pu Robert Romawia Royte chuan thu sawiin zirlai leh non teaching staff te chibai bukin hun pawimawh taka thusawina hun a nei chu lawmawm a tih thu a sawi a. Zirlai hlawhtling chhuanawm te hi chawimawi an phu in, Mizoram zirna siamthat nan leh hmasawnnana Institution pawimawh tak IASE ten an buatsaih chu fak awm a ti a. Hei hian anmahni ah rah tha chhuahin midangte nunah pawh chona leh tumruhna a thlen a beisei thu a sawi a. Tun hi a tawpna a nilo tih hriain, B.Ed Course leh M.Ed Course zir zawh piah lamah tih tur tam tak, hmabak thar tam tak a awm a ni tih hriat reng a pawimawh thu a sawi a. Tuna zirlai ni mek te pawn tan la sauh sauh turin leh Institution hming that nan tun huna an hun hmandan uluk a, nu leh pa, chhungkua, khawtual leh ram tana mi hmantlak mi thiam ni turin duhsakna a hlan a. Hriatna, thiamna hi zirna atanga tan a nih avangin, zirna chu ram hmasawn nan a pawimawh em em a, zirtirtu ni tura training na hmun leh an intuai thar nana Institute pawimawh a thawkte hian hre reng se, hre thar fo bawk se a duh thu a sawi a. Kan rilru put hmang, ngaihsan zawng leh kalphung zawng zawngte hi classroom zirna in atanga intan a ni a, engkim bul a ni tiin a sawi a. Zirturte zirtirna hmuna thawktu zawng zawng te chu ram tama theihtawp chhuah a, an thiamna te ti pung zel turin a ngen a. Zirtirtu zirtir thiam tak hian mi tam tak nunah hlawhtlinna a thlen thei a, chhungkaw tam tak chungah vanneihna a thlen thei a ni a ti a, kan rama thil tha thlen zel tur pawhin duhsakna a hlan a ni. Vawiin a M.Ed leh B.Ed University Rank Holders mi 14 te chu an kalzelna turah duhsakna a hlan nghal bawk a ni.

He hun hi Prof. Lallianzuali, Principal in kaihruaiin, Dr. Vanlaltanpuii chuan welcome address a sawi a. Dr. Zairemmawia Renthlei, Dean Students' Welfare chuan Felicitation chungchang leh rank holders te hming lamin hun tawi a hmang a, Pi Eva Lalrampari, Secretary, Students' Welfare chuan lawmthu sawiin he hun hi a khar a ni.

IASE atang hian Kum 2022 a B.Ed pass percentage chu 96.06% a ni a, Distinction-ah mi 9 leh First Division-ah mi 113 in an pass a. M.Ed pass percentage hi 92.5% a ni a, Distinction-ah mi 5 leh First Division mi 32 in an pass a ni. M.Ed ah hian top ten ah IASE atanga zirchhuak mi 10 telin, rank holder an hauh vek a. B.Ed ah hian top ten rank holder mi 4 an awm bawk a ni. Zirlai top-3 a lang chinte hi Inspire Management Group Ltd.,Trinity St.David’s University, United Kingdom-ten cash incentive an hlan a ni bawk a ni. IASE hi Department of Higher & Technical Education hnuaiah awmin, Mizoram University a in affiliate a ni a, NCTE pawm a ni bawk a ni. Kum 1975 khan Mizoram Institute of Education ti a din a ni a, Kum 2012, March ni 3 atangin IASE ti a vuah a ni a, tun dinhmunah hian B.Ed, B.Ed In-service Multimode Programme, M.Ed, M.phil leh PhD thlengin IASE hnuaiah hian a zir theih a ni. IASE hi IGNOU Centre leh Nursery Teacher Training Centre a ni bawk a, NAAC Accreditation ah 'B Grade' a ni mek a ni.