1661/2022-2023
Champhai, the 19th August, 2022: Mizoram Finance Commission ruahmannain vawiin chawhma dar 11:00 khan 2nd Mizoram Finance Commission hotute, Champhai District-a sawm bik Heads of Offices leh VC hotute chu VC te fund dawn dan, chhiah khawn leh mawhphurhna an neih chungchanga inrawnkhawmna hun video conferencing kaltlanga neih a ni. 2nd Mizoram Finance Commission lam hi Chairman Pu F.Vanlalruata chuan NIC Aizawl atangin a hova, Champhai District aiawhte hi District Bawrhsap Pu James Lalrinchhana chuan DC Conference Hall atangin a ho a ni.

He hun kaihruaitu Pu F.Vanlalruata, Chairman, 2nd Mizoram Finance Commission chuan kalkhawmte lawmna thu leh inhmelhriatna a nei a. Mipui rawngbawltu VC te thahnemngaihna fakawm tiin, khawtlang tana inpekna nasa zawk neia mipuite rawngbawlna kawngah theihtawp chhuah chhunzawm zel turin a chah a. VC te nena inpawhtlang taka inrawnkhawmna hun tha tak neih a ni thei chu lawmawm tiin, District hrang hranga VC member-te nena sawihona neih atangin a tul anga hma la tura ngaihtuahna sen a ni, a ti a. VC te chu sum lakluh leh hmanna chungchang rinawm leh tha taka ziakfel a, account felfai tak vawng thin turin a fuih bawk.

Thusawitu dang Champhai District Bawrhsap Pu James Lalrinchhana chuan VC te inrelbawlna pawimawh tak chungchanga inrawnkhawmna Mizoram Finance Commission-in Champhai District tana a buatsaih chu lawmawm tiin, he hun hi VC ten an duh leh vei zawngte hotute hnena an thlen theihna remchang tak a ni, a ti a. Mipui ngheng hnai ber VC te chu Sawrkar Department hrang hrang ten an hmalakna kawngah an tihbuai fo te an nih thu tarlangin, tha taka Sawrkar an tawiawm thinna chu fakawm a ti a, thawhhona tha tak hnuaiah theihtawp chhuaha District Administration leh Department dangte thlawp zel turin a chah a. Mizoram Finance Commission chu State chhiah tlingkhawm atanga VC te chan tur fund pekchhuah kawnga pawimawh tak an nih angin VC te tana theihtawp chhuah zel turin a ngen bawk.

Inrawnkhawmna hunah hian Pu Lalrohlua, Deputy Secretary, 2nd Mizoram Finance Commission chuan Mizoram Sawrkarin chhiah a lakkhawm atanga Village Council-te hnena rualkhai taka sum a pek chhuah dan a sawifiah a. Member Secretary Pu Lalmalsawma kaihhruaina hnuaiah sawihona leh zawhna leh chhanna hun hman a ni.

He hunah hian Lushai Hills District (Village Councils) Act, 1953 section 15 (2) in a sawi angin Village Council-ten mahni khua/vengah theuh Property Tax an khawn theih dawn leh dawn loh chungchangte, Central/State Scheme atanga siam vantlang thil heng; tui dahkhawlna, bazar shed, tui supply, vantlang inthiarna, tuilakna kawng siam leh adangte hman man 'user charge' lak chungchangte, Sawrkar atanga service hrang hrang; Residential Certificate, Income Certificate, Scheduled Tribe Certificate, Hailing Certificate, No Objection Certificate leh adangte hmuh nana Village Council hriatpuina pek chhuah thin atangin 'fee' lak a nih leh nih loh te, Mizoram Finance Commission atanga Village Council te'n State Sawrkarin chhiah a khawn khawm atanga sum an chan ve tur a ruahman thin dan leh rawtna awmte sawiho a ni bawk a. Heng bakah hian 2nd Mizoram Finance Commission-in rawtna a siam tura telh tul nia hriat, mahni veng/khuaa khuarel chhiatna ven leh pumpelh a nih theih nana ruahmanna mumal siam tul nia hriatte sawiho a ni bawk.

1st State Finance Commission ruahman ang chuan Mizoram Sawrkarin chhiah a khawn khawm State Own Tax Revenue (SOTR) za zela 15 (15%) hi Autonomous District Council, Aizawl Municipal Corporation leh Village Council-te hnenah bituk zat 58.33%, 17.50% leh 24.17% te a sem chhuah thin a ni a. Mizoram puma VC te chan tur atanga chhuta za zela 16.42 (16.42%) chu Undivided Champhai District tan pek chhuah a ni.