Tripura Transit Camp-a Tuikuk awmte special polling booth siamsak tum an nih duh lova Mizoram NGO Co-ordination Committee-in Mizorama MP Inthlanpui a kal tlang theih loh nana April ni 8 atanga tiam chin awm lova total bandth huaihawt an tum chungchanga Central Young Lai Association (CYLA) leh Lawngtlai tlawmngai pawl dangte thlawpna an ngen thu-ah Lawngtlai District Election Officer (DEO) Pi Shashanka Ala, IAS chuan vawiin khan a office chamber-ah tlawmngai pawl hruaitute kawmin, inthlan tibuai zawnga hma la lo turin a ngen.

He hunah hian Lawngtlai SP Pu Amit Goel, IPS leh Election Officer Pu Lalremruata Sailo, MCS te pawh telin, CYLA atangin President Pu J. Sangthangpuia hovin hruaitu dangte leh Lai Students' Association (LSA) a?angin President Pu H. Vanlatanpuia leh hruaitu dangte an tel bawk a. Tlawmngai pawl lam chuan Mizoram NGO Co-ordination Committee-in an thlawpna an rawn ngen dan leh hemi chungchang hi naktuk lama rel tum a nih thu sawiin, an thlawp dawn leh dawn loh sawi chian theih a la nih loh thu an sawi.

Lawngtlai DEO Pi Shashanka Ala chuan tlawmngai pawlte rilru leh an hma lakna chu a hriat thiampui thu sawiin, chutih rual chuan ngun taka ngaihtuahna sen a tul thu a sawi a. MP inthlan pawimawhzia leh inthlan a nih lohva nghawng a neih theihte sawiin, MP inthlan kal tlangpui theih a nih loh chuan Mizoramin Lok Sabha-ah ai awh kan neih dawn lo va, inthlan buatsaih tura sum leh tha tam tak sen tawhte chu a thlawnin a kal ral dawn a ni, a ti a. Inthlan tibuai thei zawnga hma la lo hram turin tlawmngai pawl hruaitute chu a ngen a ni.

Tlawmngai pawl lam chuan DEO-in a ngenna chu an hriat thiampui viau rualin, naktuka an thu tlukna azira hma an lak zui a ngaih tur thu an hrilh ve bawk.