2006/2023-2024

Lawngtlai dated 25th September 2023: Vawiin khan Lawngtlai District Deputy Commissioner Office Chamber- ah Pu R.Khawlliana (88) S/o Dartlinga (L) hnen ah India ram a civil mite tan a huaisenna chawimawina   Jeevan Raksha Padak Award  hlanna hun hman a ni.

He huaisen chawimawina in a ken tel Citation leh Medal hlantu Lawngtlai DC, Pu H.Lalhmingthanga chuan mi ropuite chawimawina hun hman a ni thei chu lawmawm a tih thu sawiin,  Lawngtlai District chhunga India ram a civil mi, mi huaisen chawimawina sang ber dawng thei a awm chu a ropui a tih thu a sawi.

DC  chuan hetiang a chawimawina sang tak dawng thei tur a hma laksaktu khawtlang hruaitute chu fakawm a tih a sawi a, chawimawina chu  mahni duhthu a dawn ngawt theih a nih loh thu leh mi huaisen leh a phute tan chauh a nih thu sawiin District mipui ten a hlutna hrethiam a, thangtharte thinlungah midangte tan a inpekna tuh nung zeltu a nih theih nan he chawimawina hi hlut leh lawmpui thiam a pawimawh thu a sawi.

Pu R.Khawlliana hi stroke avanga enkawl mek niin a chawimawina   hi a fanu Pi R.Vanlaldiki hnen ah hlan a ni a. Tangka fai erawh August 21,2023 khan Cheque a hlan a ni tawh bawk a ni.

He chawimawina inkhawm ah hian Pu C.Laltluanga’n chhungkaw aiawhin thusawiin  Pu R.Khawlliana hi kum upa lam a nih bak ah taksa hrisel lohna avangin enkawl mek a nih thu a sawi a. Midangte nun chhan thei tur dinhmuna a ding hi an chhungkua pawhin an lawmpui an chhuan thu tarlangin he chawimawina sang dawng thei tur a khawtlang leh sawrkar a thuneitute hmalakna ah lawmthu a sawi bawk a ni.

Pu R.Khawlliana hian Ni 27, October, 2021 khan an kawmchhak a Power & Electricity Department ten Transformer an dah siamthat tum a hnathawk lai Current-in a man chu mau tlawn hmangin a chhanchhuak a ni.

Jeevan Raksha Padak Award hi India ramin mi huaisen te, hun leh hmun harsa tak kar a mahni nunna   thapa midang nunna chhanchhuaktute hnen a a hlan thin a ni a. Award hian Medal, Citation leh Pawisa fai cheng 1,00,000 a keng tel a ni.

Vawiin Medal leh Citation hlanna puala inkhawm hi Pu Abraham Beirazi Khithie, Addl. DC chuan kaihruaiin, Lawngtlai DC office staff te, AOC khawtlang hruaitute leh Lawngtlai District MJA te an tel a ni.