Vawiin chawhma dar 10:30 khan DC Conference Hall, Lawngtlai-ah chhiatrupna thleng thei laka invenna leh inruahman dan tur lo thlir lawkna \'Consultation Meeting on Town Disaster Management and District Disaster Management Plan\' neih a ni. He hunah hian Disaster Management in a kaihhnawih department hotute leh Village Council hrang hrang te bakah NGO hruaitute an tel a.

Pu B. Lalhmingthanga, DC, Lawngtlai leh Chairman, District Disaster Management Authority, Lawngtlai District chuan he hun hi hawngin a kaihruai a. Disaster Management Plan tha tak hi Lawngtlai hian kan mamawh a, vawiina he hun hmang tura lo kal te hi a hlawhtlinna atana meizang hlaptu ni turin kan inbuatsaih a tul a ni a ti.

Pu Dominic Lalhmangaiha, State Project Officer, UNDP, Mizoram chuan Disaster Management Plan pawimawh zia sawiin Lawngtlai hi leimin nasatna hmun a ni a, lirnghing leh chhiatna thleng thei laka inven dan kan ngaihtuah a tul a ni a ti a. Inrinlawkna avanga chhiatna tamtak pumpelh a nih theih dan sawifiahin Sorkarin chhiatrupna ven dan tur chungchanga hmalakna a neih te a sawi lang a. In satute pawhin mithiamten a him dan tur an sawi tha taka zawm a tul a, mahni thua building plan lo tih danglam mai te chin loh tur tiin a sawi a ni.

Pu Lungduhsanga, PSA, DM&R Cell, Lawngtlai chuan Lawngtlai Town Disaster Management Plan & District Disaster Management Plan ruahmanna siam a sawi fiah a. He Plan chhunga mawhphurhna nei department leh organisation te chu an mawhphurhna hriattir niin an lo zir chian tur copy pek an ni a. Siamthat ngai laite siamthaa February, 2012 chhunga pawm fel a nih theih nan he DM Plan chungchanga sawi duh nei tan February 23, 2012 thlengin hun hawn a ni.