Pu Brahmo Choudhury, Planning Commission Adviser, (NE) chuan Kolasib District chhunga NLUP hmanga kut hnathawktute hnathawhna hmun thenkhat vawiin khan a tlawh a. A thil hmuhte chu lungawithlak a tih thu sawiin hei hian ngaihtuahna thui tak min pe a, nakin huna Zoram mipui te dinhmun tithatu tur leh ram tana chhenfakawm hausakna la thlentu tur a ni ang, a ti.

Pu Choudhury hian Kolasib a thlenin DC Conference Hall-ah DC leh NLUP hnathawktu Line Department 8 te a kawm a. Thu sawiin NLUP hmanga hnathawh mekah Department hrang hrangte chu an Deptt. Kaltlanga hnathawh theuhte tumah insu buai lova thawk a, inpeizawn zawnga thawk turin a chah a. NLUP chuan mipui mimir thatna tur a pawchhuak ngei tur a ni, a ti. Sawrkar laipuiin Look East Policy a kenkawh mek laia ngaihtuahna awm chu Mizoram hi a awmna (geographical location) avangin khua reiah chuan ala vannei hle dawn a ni, a ti a. A chhan chu Hmar chhak ram dinchhuahna tur hi ramdang nena insumdawn tawnnaah thui tak a innghat a. Mizoram hi Asian ram te kalpawh a awlsam avangin a pawimawh hle a ni, Pu Choudhury chuan a ti a ni.

Pi Niharika Rai, DC chuan Pu Choudhury-an a district a rawn tlawh chu lawmawm a tih thu sawiin NLUP hmanga District chhunga hnathawh mek dan te a sawi a. Pu Laskar, OSD, NLUP Apex Board pawhin he hunah hian thu sawiin, Mizoramin NLUP bul a tan tirh dawn atanga a tul ang apianga Central a min lo pui thintu a nih avangin Pu Choudhury chu lawmthu a hrilh a ni.

Pu Choudhury hian Thingdawla Horticulture Centre te, Mau leh hmunphiah china hmun te a fang kual a. Hemi hnu hian Saihapui-a Oil Palm Nursery hmun leh Bukvanneia Oil Palm sawngbawlna khawl bunna tur hmun te a tlawh a ni.

Pu Choudhury hi Pu L.R. Laskara bakah Dr. Robert Rualthankhuma, Project Coor, NLUP Apex Board ten an tawiawm a. Field visit ahte hian Kolasib atangain Officer ten an tawiawm a ni.