Electoral Roll 2nd Special Summary Revision 2018 neih tur atan vawiin chawhma dar 11 khan Lawngtlai District-a assembly constituency pathuma draft electoral roll chu District Election Officer Pu N. Chakhai MCS chuan a office chamber-ah a tlangzarh.

Draft E/Roll-ah hian 36-Tuichawng bialah voter 29356 (hmeichhia - 14470; mipa - 14886) an awm a, 37-Lawngtlai West-ah voter 25793 (hmeichhia - 12808; mipa - 12985) awmin, 38-Lawngtlai East bialah voter 23238 (hmeichhia - 12019; mipa - 11219) an awm a. Lawngtlai District-a assembly bial pathumah hian vote nei hmeichhia 39297 leh mipa 39090 awmin, an vaiin voter 78387 an awm a. Voter zawng zawng hian EPIC an nei vek bawk.

MLA Inthlanpui 2018 puala 2nd special summary revision atan hian ni 21.08.2018 thleng claim & objection siam theih a ni ang a. Hei hi ERO-te'n ni 20.09.2018 hmaa ching felin, ni 26.09.2018 hmain e/roll siam that hna thawh a ni ang a. Ni 27.09.2018 hian final publication tihchhuah hman tum a ni.