Vawiin khan Lawngtlai DIPRO Pu C.Lalhruaitluanga chuan a office-ah Lawngtlai District-a accredited journalist mi panga (5) hnenah Press Accreditation Card (PAC) a hlan.

Pu C.Lalhruaitluanga chuan sawrkarin thu thar theh darh kawnga mi rin tlaka a ngaihte hnenah accredited journalist nihna chu a hlan thin tih sawiin, accredited journalist nihna pek tharte chu lawmpuina a hlan a. Thu chhuah tur thlan kawnga fimkhur tura chahin, sawrkar leh mipui inkara palai an nihna hre renga ram leh khawtlang nun siam tha zawnga hna thawk thin turin a chah bawk. Accredited journalist-te chuan an tana hamthatna awm theite chu an hmu ngei ngei tur a ni tiin, Lawngtlai DIPRO chuan PAC hlan tharte chu ram leh hnam tana inlungrual taka an thawh hona chu chhawm nung zel turin a sawm nghal a ni.

Lawngtlai District MJA President Pu ZD Dengngura pawhin sawrkar chungah lawm thu sawiin, chanchinbu mite chuan chanchin thar an hmuh ang ang theh darh nghal mai lo va, thil siam tha zawng chauhva chhuah thin a pawimawh thu a sawi bawk.

Lawngtlai District-a PAC dawngtute chu:

1. Pu V.Lallianzuala, Editor, Lairam

2. Pu ZD Dengngura, Editor, Phawngpui Express

3. Pu Lalngheta Ralte, Editor, The Lawngtlai Post

4. Pu H.Lalrinmawia, Editor, Rameng

5. Pu Elvis Lalthangzuala, Editor, Rauthla