1-Mizoram (ST) Parliamentary Constituency atana Lok Sabha MP Inthlanpui 2019 chu Lawngtlai District chhunga polling station 165-ahte nimin khan tluang taka zawh a ni.

Mizoram hmun dang ang bawkin Lawngtlai District chhunga state assembly constituency pathuma polling station 165-ahte hian zing dar 7-ah vote thlak tan a ni a. Vote thlak hma hian khawl that leh that loh enchhin nan mock poll neih niin, polling station zawng zawngah hian tluang takin inthlan kalpui hlawm a ni.

Lawngtlai District chhunga assembly constituency pathuma polling station 165-a voter 82711 atangin voter mipa 27700 leh hmeichhia 25815, an vaiin voter 53515-in vote an thlak a, vote hi 64.70% a tla a. Polling station 62 awmna 36-Tuichawng (ST) Assembly Constituency-ah voter 31470 awmin, vote 23450 (74.52%) a tla a. Polling station 68 awmna 37-Lawngtlai West (ST) Assembly Constituency-ah voter 27058 awmin, vote 17627 (65.15%) a tla a. Polling station 35 awmna 38-Lawngtlai East (ST) Assembly Constituency-ah voter 24183 awmin, vote 12438 (51.43%) a tla bawk. Lawngtlai District pumpuiah Election Duty Certificate (EDC) vote tla 978 a awm.

36-Tuichawng bialah 36/20-Nakdarasora polling station-a vote 224 awmah vote 208 (92.86%) tlain, vote tlak thatna ber a ni a. 36/60-Parva-III polling station-a vote 271 awmah vote 116 (42.80%) tlain, vote tlak chhiatna ber a ni.

37-Lawngtlai West bialah 37/62-Chamdurtlang-II polling station-a vote 72 awmah vote 71 (98.61%) tlain, vote tlak thatna ber a ni a. 37/17-College Veng 'S' polling station-a vote 841 awmah vote 432 (51.37%) tlain, vote tlak chhiatna ber a ni.

38-Lawngtlai East bialah 38/15-Vartek polling station-a vote 146 awmah vote 108 (73.97%) tlain, vote tlak thatna ber a ni a. 38/12-Chandmary South polling station-a vote 1123 awmah vote 416 (37.04%) tlain, vote tlak chhiatna ber a ni thung.

Vote thlak hun khar a nih hnuah polling station tina polling party-te chuan Lawngtlai an pan khawm nghal a. Strong room awmna Govt Lawngtlai College-ah lo dawnsawn zel niin, vote thlakna EVM leh polling material dangte chu felfai taka chhinchhiahin strong room-ah dah luh nghal zel a ni a. Polling party-te hian harsatna awm lovin vawiin khan Lawngtlai an thleng kim thei vek a ni.

Attachment

  • Loading attachment...