Member of Parliament (Lok Sabha) 2019 Election chu Assembly Constituency pasarih awmna Lunglei District-ah tluang taka zawh fel a ni. Inthlanna hi Lunglei District General Observer H. Lallien Songate, IRS leh pianphunga rualbanlote tana ruat bik Accessibility Observer Pu Sangdingliana, IAS ten zing kar atangin Polling Station engemawzat kal chilhin an enfiah a ni.

Vote thlak atanga a lan danin Lunglei District Assembly Constituency pasarih awm atanga vote tla zat chu za zela 64.95  niin 35-West Tuipui ah vote tla tha berin za zela 72.30 a tla a, 33-Lunglei South ah vote tla hniam berin za zela 59.91 a tla a ni. Assembly Constituency tina vote tlak dan chu a hetiang hi a ni:

Lunglei District voters awm zat chu mi 1,08,135 niin hemi zinga 53,784 (49.74%) chu mipa an ni a, 54,351 (50.26%) chu hmeichhia an ni. Nimin inthlan ah khan mipa voter 35,481 ten vote thlakin mipa vote za zela 65.97 a tla a, hmeichhei voter 34,869 ten vote thlak in hmeichhe vote za zela 64.16 a tla thung a ni.

Nimin inthlanna a vote tla zat te hi darkar hnih bi dan zelah Polling station tin ten vote tla zat report-na  tur Pollstar ti a  vuah  hmangin  an pe  zel a. District Control Centre atana ruat DC Office 2^nd Floor ah Polling Station tin atanga report dawng turin Call Centre leh Control Room te buatsaih niin heng report te hi ECI lamah thawn thlak ve leh zel a ni a. Vote thlak hun chhung hian Lunglei DEO Pi K. Lalrinzuali leh District official dangten Control Centre hi an vil reng a ni.

Kumin inthlan thupui ‘Accessible Elections’ a nih angin painphunga rualbaloten (PWD) vote an thlak ve ngei theihna tur in ruahmanna te siam niin polling station an panna leh letna tur lirthei ruahman sak an ni a. Pianphunga rualbanlote (PWD) a tul anga tanpui leh buaipui tur in tlawmngaia inpe YMA Volunteers mi 228 te chu polling station 131 ah lo duty in vote tluang takin an thlak thei a ni. Hmeichhe hlang duty na Dingdi Polling Station 25 ah te pawh tluang tak inthlan hi kalpui a ni. Lunglei District chhungah hian Critical leh Vulnerable Polling Station a awm lova, District chhungah pianphunga rualbanlo (PwD) mi 501 an awm a ni.  Tun tumah hian election duty-te hian Election Duty Certificate (EDC) pekchhuah hmangin an remchanna apiang polling station ah vote an thlak a. Lunglei DC Pi K. Lalrinzuali leh Lunglei SP Pu C. Lalthanmawia te pawhin Election Duty Certificate (EDC) hmang hian 31/20 Electric Veng III Polling Station ah vote an thlak a ni.

Inthlana a duty, khawl leh bungrua lo let te hi tha taka lo dawnsawn niin Saikuti Hall ah Receiving Team ten anlo hmuak a. 33/37 Thangpui (Lunglei South) polling party te lo thleng hmasa berin nimin tlai dar 5:55pm ah Saikuti Hall an lo thleng a ni. Helai hmuna duty te chaw ei tur hi Venglai Branch YMA in an buatsaih a.  Inthlan hmanrua EVM leh VVPAT lo let te chu te chu Saikuti Hall a Strong Room siamah dah luh an ni.