Vawiin khan DC Conference Hall, Mamit-ah Election General Observer Pu Akshay Sood, IAS hovin Political Party hrang hrang aiawhte nen Mizoram MP Lok Sabha Election neih zawh takah Mamit District chhunga Polling Station 116 leh Special Polling Station 9-a Vote tlak dan tlangpui leh thil danglam thlengte thlirletin Scrutiny neih a ni.

Scrutiny neihna-ah hian Political Party aiawhte chuan Vote thlak dan chungchangah engmah lungawi lohna a awm loh thu leh kan District chhungah thil duhawm lo thleng leh sawisel ngai a awm loh thu sawiin inthlanna felfai leh muanawm kan neih chhan District Election Officer leh Election Officials zawng zawng chungah lawmthu an sawi.

Political Party aiawhte hian MLA Election aia Vote tla a tlem zawk chu thil thleng thin pangngai tho a nih thu an tarlang a. Amaherawh chu, Election Commission of India duhdan anga Voter Slip bakah Identity Proof nana document eng emaw tal ken tura Instruction awm chuan Vote tla zat tura beisei a  tlak hniamtir hret niin an tarlang.

General Observer chuan Mizoram boruak nuam tak hnuaiah muanawm leh felfai taka Vote thlak zawhfel a ni thei chu lawmawm a tih thu a sawi a. Dr. Lalrozama, IAS, District Election Officer pawhin buaina leh harsatna lian tham tawk lova Vote thlak zawhfel a ni ta chu lawmawm a tih thu sawiin tluang taka Vote thlak a nih theihna tura thawktu zawng zawngte inpeknaah lawmthu a sawi bawk.

Scrutiny-ah hian Mamit District chhunga Assembly Constituency pathuma Vote tlak dan tarlan niin 1- Hachhek Assembly Constituency-ah 60.50% vote a tla a. 2- Dampa-ah 68.28% tlain 3-Mamit Assembly Constituency-ah 66.12% a tlak thu tarlan a ni.

Vawiin Scrutiny-ah hian Election Officials-te bakah Political Party hrang hrang aiawh MNF, Congress, ZPM leh BJP aiawhte an tel a ni.