Vawiin khan Lawngtlai District-a block zawng zawnga mi retheite chawikanna tur Mizoram State Rural Livelihood Mission (MzSRLM) hma lakna tur chu Lawngtlai-III-a CYLA Hall-ah H&TE changtu Parliamentary Secretary Pu H. Zothangliana’n a hawng.

DRDA Lawngtlai leh MzSRLM buatsaih he hun hmannah hian Pu H. Zothangliana chuan Lawngtlai District-a block zawng zawngah MzSRLM-in mi retheite eizawnna ngelnghet siamsak tura hma an la tur chu lawmawm a tih thu sawiin, sawrkarin heti ang chi ruahmanna hrang hrang a siamte a hlawhtlin theih nan mipuiin mawhphurhna sang tak kan nei a ni, a ti a. Sawrkar sum a thlawna dawn tum ringawt lovin, sawrkar hma laknate din chhuahpui tumna rilru kan put a pawimawh a ni, a ti. Tunlai khawvelah sawrkar ruahmannaa sum che vel reng reng chu bank kal tlanga tih zel a nih tawh avangin, bank-a thawktute chu mipui hma khua ngai tak leh dawh thiam taka hna thawk a, kut hna thawktute sum puktir (loan pek) chungchangah pawh inhawng taka thil ti thin turin a chah nghal bawk.

He hun hi Lawngtlai District Rural Development Agency (DRDA)-a Project Director Pu R. Lalremsanga MCS chuan a kaihruaiin, hun hman a nih chhan te a sawi fiah a. Lawngtlai Bawrhsap Dr A. Muthamma IAS chuan kal khawmte lawmna thu sawiin, MzSRLM atangin Pi Ruth Lalawmpuii’n PowerPoint presentation hmangin MzSRLM chungchang a sawi fiah a. LADC ai awhin Deputy Chairman Pu LR Dingliana Chinzah-in thu a sawi bakah, Community Resource Person Pi K. Chawimawithangi’n thu a sawi bawk a. Chawngte BDO Pu K. Zorammuana’n lawm thu sawiin, hun khar a ni.

MzSRLM hi Mizoram thingtlang khuaa mi retheite’n Self Help Group (SHG) hmanga mahni inhai kuaa eizawnna nghet an neih theih nana hma lakpuina a ni a. Kum 2013 April ni 22 khan Mizoramah tan niin, tunah hian Mizoram puma block 10-ah hna an thawk mek a, block 7 dangah hma lak chhoh leh tur a ni. Tun thleng hian Self Help Group 2307 din tawh niin, SHG inzawm khawmna pawl Village Organisation 141 din a ni tawh bawk. Lawngtlai District bikah chuan nikum khan Sangau Block-ah bul tan a lo ni tawh a. Sangau Block-a khaw 13-ah SHG 206 lai din tawh niin, tunah hian Lawngtlai District-a block dang pathum – Lawngtlai, Bungtlang ‘S’ leh Chawngte Block-ah te kalpui chhoh leh tur a ni.

Vawiina he hun hmannaah hian LADC-a EM leh MDC eng emaw zat bakah, MzSRLM lama thawktute, sawrkar officer-te, block hrang hranga VC leh SHG ai awhte, zirlai naupangte, chanchinbumite leh Khuallian tawiawmtu party hruaitute an tel a ni.