Nimin khan Lawngtlai CMO Conference Hall-ah Lawngtai District chhunga District Hospital, CHC leh PHC-a thawktute tan Kayakalp Award chungchang zir hona buatsaih a ni.
He hun hi Lawngtlai Chief Medical Officer Dr Thani Pachuau chuan a kaihruai a. Kal khawmte lawmna thu a sawi bakah, damdawi in fai inelna (Kayakalp Award) kalphung leh endik dan te, damdawi in enkawl fai dan tur te a zirtir a. Senior Medical Officer Dr S. Thaizi chuan faina hnatlang kalpui dan tur te, natna hrik tihrem dan leh damdawi in leh hmanrua tihfai dan te a zirtir bawk.
Kayakalp hi Swachh Bharat Abhiyan hma laknaa sawrkar damdawi in fai ber thlanna a ni a. QAC NHM hnuaiah kalpui niin, Mizoramah chuan kum 2015 atangin sawrkar laipui thupek angin bul tan a ni a. Kayakalp hian a tum ber chu sawrkar damdawi inte’n kalphung tha leh dik an zawm nana hma lak a, mipuite pan tlak ni ngei tura siam a ni a. Hemi atan hian tehfung chi hrang hrang siam niin, chu’ng chu zawm kim vek a ngai a ni.
Kayakalp Award-ah hian District Hospital huanga pakhatna chuan cheng nuai 50 leh thuziak an dawng ang a, CHC/SDH-a pakhatnain cheng nuai 15 leh thuziak dawngin, PHC-a pakhatnain cheng nuai 2 leh thuziak an dawng ang. Nikum khan Lawngtlai District chhung atangin Lungpher S PHC chuan lawmman pakhatna a lo dawng tawh a ni.
Attachment
- Loading attachment...
