2669/2023-2024

Lawngtlai dated 5th November 2023: Tukin khan Govt. Lawngtlai College atangin MLA inthlanna buaipui tur Polling Official-te chuan an duty-na hmun tur Polling Station panin an kal chhuak tan a. Polling Station 86-a Polling Official-te kal chhuak hmasa in naktuk hian Polling Station 95-a duty tur te an kal chhuak ve leh dawn a ni. Polling Official-te kalchhuahna hun hi Pu Joseph H.Lalramsanga, District Election Officer leh Election Observer-ten an enpui a ni.

Govt. Lawngtlai College-ah hian Electronic Voting Machine bak ah Voting Compartment leh Polling Official-te mamawh hrang hrang pek chhuah niin tul zual a hman tur Emergency Light-te ken tir an ni a. A hmun an chhuahsan hma in Returning Officer leh Nodal Officer-te enpuina hnuai ah EVM endikna leh EVM hnu chhuina, Traccar Apps an hmang ngei a ni tih enpui an ni bawk. Polling Official-te hi an mahni bialtu Returning Officer-te hnen ah theuh inhriattirin an thil ken tur hrang hrang a kim leh kim loh endik sak vek an nih hnu ah an duty-na tur Polling Station panin an kal chhuak a ni. 36-Tuichawng AC chhung a Polling Station 53, 37-Lawngtlai West AC chhung a Polling Station 32 leh 38-Lawngtlai East AC chhung a Polling Station 1-a duty tur te vawiin hian an kal chhuak a, naktuk chawhma hian Polling Station 95-a duty tur te an kal chhuak leh bawk ang.

Lawngtlai district-ah hian Voter 91439 awmin 36-Tuichawng Assembly Constituency-ah voter 36042 an awm a, 37-Lawngtlai West ah voter 29493 awmin 38-Lawngtlai East ah voter 25904 an awm bawk a ni. Voter awm zat atanga 45685 chu mipa an ni a, 45754 chu hmeichhia an ni a. Lawngtlai district-ah hian Service Voter 232 awm anga chhinchhiah a ni bawk. 36-Tuichawng AC ah Polling Station 70 awmin 37-Lawngtlai West AC ah Polling Station 69 awm a.  38-Lawngtlai East AC ah Polling Station 42 a awm bawk a ni.