No.2639/2021-2022
Aizawl Khuangchawi thla ni 18, 2021: Vawiin khan North Eastern Council (NEC) atanga block hnufual deuhte tihhmasawnna tur ruahmanna hnuaia Lawngtlai District chhunga rural development block pahnih - Bungtlang 'S' leh Chawngte RD Block tana Block Development Plan siam tur chungchangah Lawngtlai Bawrhsap Dr Andrew H. Vanlaldika hovin a office chamber-ah thutkhawm buatsaih a ni.
Chairman Dr Andrew H. Vanlaldika chuan NEC atanga Lawngtlai District chhunga block pahnih tihhmasawnna tur ruahmanna awm chu lawmawm a tih thu sawiin, hemi atana hma lak tul zualna laite sawi ho tura thutkhawm koh a nih thu a sawi a. Hei bakah hian development of identified village hnuaia hma lakna atan Bungtlang 'S' chu thlan a ni bawk tih sawiin, hemi atana line department-te chu ngun taka ngaihtuahna seng turin a chah a ni.
He hunah hian line department hrang hrang - health department, education department, ICDS leh BDO te telin, hma lak tulna lai hrang hrang sawi ho a ni a. Line department-te chu an hnuaia hma lakna tur rawtna siam a, identified village tan ni 21.10.2021 hma leh block tan ni 27.10.2021 hmaa DC office-ah concept paper theh lut tura tih an ni a. Hemi atang hian DPR siamin, Planning Department kal tlanga theh luh ve leh tur a ni.
NEC hnuaia hmasawnna hnathawh kalpuina turah hian block pahnih tan hian cheng vaibelchhe nga (Rs 5 crore) ve ve leh identified village tan cheng vaibelchhe hnih (Rs 2 crore) ruahman a ni.
Attachment
- Loading attachment...
