702/2026-2027

Lawngtlai, 26th May 2026 : Special Intensive Revision ( SIR) 2026 kalpui tura inbuatsaihna kal zelah vawiin khan BLO, Addl. BLO leh Supervisor - te tan DC Conference Hall- ah 'Training' neih a ni a. Lawngtlai District Election Officer (DEO) Pu Donny Lalruatsanga chuan a hmanpui.

Pu Donny Lalruatsanga chuan kalkhawmte chungah lawmthu a sawi a. SIR 2026 kalpui turin Election Official - te thahnemngai takin an thawk thin tih tarlangin, an thawhrimna a fak awm hle a ti a. Electoral Roll- tha, felfai leh thianghlim nei turin BLO, Additional BLO leh Supervisor - te an pawimawh hle tih tarlangin, an mawhphurhna hriaa theihtawp chhuah turin a chah a. India khua leh tui dik tak, kum 18 tling chinte an chuang ngei ngei tur a ni tih sawiin, chutih rualin a chuanglo tur te an chuan palh a hlauhawm hle a, fimkhur a tul hle a ni, a ti. A bik takin Lawngtlai District- chu lianin, inkalpawh leh inbuakpawh pawh a harsa thin hle tih a hriatthiam thu tarlangin chutih rualin E/Roll felfai neih a tul hle tiin, BLO, Addl. BLO leh Supervisor - te thahnem ngai taka thawk turin a chah a ni.

DEO chuan SIR 2026 - ah Electoral Roll- thar hlak siam a ni dawn a, BLO- te In tina kala (house-to-house visit), voter-te hming, kum, leh nihnate ziah luh thar hna (enumeration), an kalpui dawn tih tarlangin langtlang tak leh fimkhur taka hnathawh pawh a tul dawn hle a ti a. Enumeration Form hmanga Draft Roll siam phawt tur a nih angin, BLO- te chu Enumeration Form- sem chhuah leh lakkhawm kawngah a hun takah engkim tih a tul dawn tih sawiin, dan in a phut anga vawi 3 In tina kal ngei ngei turin a chah a. Pu Donny Lalruatsanga chuan BLO, Addl. BLO leh Supervisor - te theihtawp chhuah tur leh DEO Office thawhpui tlat tura sawmin, tha taka training - nei turin duhsakna a hlan nghal bawk.

Pu Collin Hlychho Election Officer chuan training SIR 2026 nihphung tlangpui leh kalpui a nih dan tur sawizauna a nei a. Inthlanna dik leh felfai awm tur chuan E/ Roll- dik leh felfai neih phawt a tul thu tarlangin, hemiah hian BLO, Addl. BLO leh Supervisor - te kutah thui tak a innghat tih a sawi a. Training - koh a nihna ngaipawimawha, tha leh uluk taka Training- nei turin a sawm nghal a ni.

SIR 2026 chungchanga BLO, Addl. BLO leh Supervisor - te hriattur pawimawh inzirtirna hi hmun thum- DC Conference Hall, Lawngtlai; BDO Conference Hall Chawngte leh VC House, South Lungpher ah te neih a ni a. District Master Trainer - pathum Pu Lalnunpuia Renthlei, (AERO), Pu Thomas Maratha Hlychho (AERO) leh Pu R. Vanlalruata (AERO) ten training - hi an pe a ni.

Vawiin hun hmannaah hian Lawngtlai District - a BLO, Addl. BLO leh Supervisor - te an tel kim tha hle a, Pu Collin Hlychho,  Election Officer,  chuan lawmthu sawiin hun a khar.