Sawrkar laipuiin ram pum huapa faina beihpui thlak nana Swachh Bharat Mission a kalpui mekah district tina thingtlang khaw pakhat, faina lama khaw dangte entawn atana hma lak bingna tur thlan chhuah tur a tih angin, Lawngtlai District-ah chuan Lawngtlai aṭanga kilometre 50 vela hla, Saizawh East khua chu Swachh Bharat Mission Model Village atan thlan a ni.

Lawngtlai District Swachh Bharat Mission (Gramin) hi PHE Department te'n kalpuiin, Model Village-a thlan, Saizawh East-ah hian nimin khan faina lama hma lakna tur leh model village-a thlan an nih chhan te hrilhfiahna hun buatsaih a ni a. PHE Department Lawngtlai WATSAN Division-a Executive Engineer Er Laltlanchhunga chuan faina lama beihpui thlak chu Lawngtlai District chhungah uar takin kalpui mek a ni a, khaw dangte'n an entawn thama hma lakna nasa zawka kalpui turin Saizawh East khua chu thlan a ni tih sawiin, khawtlang hruaitute leh mipui lam te'n theih tawp chhuaha hma an lak loh chuan Model Village thlan chuan awmzia a nei dawn lo a ni, a ti a. Model Village-a puan an nih aṭanga kar hnih khat lek chhung pawha Saizawh East khuaah faina lama hma lakna nasa tak hmuh tur a awm chu lawmawm a tih thu a sawi.

Saizawh East khua hi in 140 vel awmna niin, khawtlang hruaitute chuan sawrkarin faina lama beihpui thlak nana an khua an thlang chu lawmawm an tih thu leh theih tawp chhuaha hma lak an inpeih reng thu PHE hotute hi an lo hrilh a ni.