Pu Robert Romawia, Minister, Sports & Youth Services etc chuan nimin khan Mamit khawpui chhunga infiamna hmun tura ruahman Multipurpose Hall, Football Playground Luangpawl bakah Indoor Stadium, Mangkhawngdai Field leh Tennis Court hmunte a tlawh a. Er Lalzirliana, Bialtu MLA chuan Sports Minister hi a tawiawm.

Mamit District Volleyball Association leh District Thalai pawl huahawta District Volleyball Tournament neih mek chu tlawh nghalin Pu Robert Romawia chuan Mizoram Sawrkar chuan thalaite infiamna lama tihhmasawn chu a ngaihpawimawh hmasak anih angin Mamit District mipuite tan pawh hmalak mek zel a ni a ti a. Kan hma lawkah hian Mizoram State Games neih a ni dawn a, kan infiam mi talent hrang hrang nei te'n kan theihna kan pholanna remchang anih dawn avangin hemi atan hian Mizoram Sawrkar chuan cheng Nuai 150 a ruahman tawh thu a sawi. Mizoram thalaite ruihhlo, damdawi leh zute'n min tihbuai thinna chu infiamna hmanga thlak hlawk chu kan tum a ni a ti. Mamit District tlangval Pro Volleyball khel pha mi 9 lai mai an awm chu  lawmawm a tih thu a sawi a, Khawthlang mi a nihna ang pawhin Khawthlang tlangval hmasawnna chuan a tihlawm thu a sawi bawk.

Mamit District tan infiamna hmunpui Multipurpose Hall changtlung tak din tum a ni a. A hmun tur a tana lo duanlawk Luangpawl veng a mi chu duhthusama a zauh tawkloh deuh avangin thuneitute nen sawiho leh a nih dawn thu a sawi bawk a ni.

Er Lalzirliana, Bialtu MLA pawhin Mizoram tana Infiamna lama kan hotupa berin Mamit min rawn tlawh chu lawmawm a tih thu a sawi a. Mamit a rawn tlawh chhan tak nilo mahse Volleyball Tournament neih lai anih avanga kan inkhel a hmun ngeia min rawn enpui chu vanneihthlak a tih thu a sawi a. Mamit District mipui thalai infiam mite tana tangkai tak tur Multipurpose Hall changtlung tak kan sawrkar leh Sports minister thahnemngaihna avanga ruahman an ni ta chu District aiawhin Sawrkar chungah lawmthu a sawi bawk a ni.

Sports Minister leh Bialtu MLA-te hian District Volleyball Tournament neih mekna atan hian tanpuina pawisa fai an hlan bawk a ni.

Sports Minister hian Tourist Lodge Mamit-ah Mamit District chhung Sports Committee hrang hrang hruaitute, GSA hruaitute leh khawtlang hruaitute nen inkawmhona neih a ni bawk.

Pu Robert Romawia, Sports Minister-in  Mamit khawpui chhunga infiamna hmun hrang hrang a tlawhkualna-ah hian Bialtu MLA Er Lalzirliana bakah Dr Lalrozama, IAS, District Bawrhsap, Mamit District Sport hruaitute, GSA hruaitute bakah khawtlang hruaitute'n an tawiawm a ni.