484/2025-2026
Lawngtlai, 7th May, 2025 : Vawiin chawhma dar 11:00 khan Lawngtlai District Agricultural Marketing Committee (DAMC) chuan DC Conference Hall-ah thutkhawm an nei a, Pu David Lalrinawma, Addl.Deputy Commissioner, chuan thutkhawm hi a kaihruai.
Pu David Larinawma chuan DAMC Member- lo kalte hnena lawmthu sawina a nei hmasa a. Mizoram sawrkarin Bâna Kaih (Handholding Policy) a kalpui mekah Lawngtlai District chhunga Sawhthing, Aieng, Hmarcha leh Hmunphiah chingtuten hlawk leh man man zawka an hralh chhuah theihna tura theihtawp chhuah chhunzawm zel a nih thu a tarlang a. A bik takin Sawhthing lei thawhkhatna hlawhtling taka kalpui a nih thu a sawi. Mizoram Sawrkarin Sawhthing lei leh hralh thawhhnihna kalpui turin ruahmanna fel fai taka a siam tawh tih tarlangin, Addl. DC chuan DAMC Member- te chu theihtawp chhuah chhunzawm tura chahin, kut hnathawktuten hlawkna an chan ngei theihna turin duhsakna a hlan nghal bawk.
Pu Caleb Vanlalrinngama,ADAO, DAMC Member Secretary aiawh chuan report pekna a nei a. Sawhthing lei thawhkhatnaah Lawngtlai District chhungah sawhthing 1,79,769 Kg hralh chhuah niin, cheng 89,88,450 chu DBT a transfer a ni, ati a. Tun dinhmunah sawhthing chawh tan leh mek a nih thu tarlangin, Secondary Collection Centre- ah 1000 quintals vel stock tawh niin, Lawngtlai District - a Sawhthing chawh loh awmzat chu - 700 quintals vel a ni, a ti.
Thutkhawmah hian Mizoram Agricultural Marketing Board (MAMB) ten sawhthing lei thawhhnihna chungchanga hriattirna an chhuah sawiho a ni a. MAMB in DAMC kuta mawhphurhna a nghah te chu tha taka hlen ngei ni se an ti a. A bik takin sawhthing lei sak ve lohna khua awmte chu ngaipawimawha chawh hmasak tir tura hmalak ni se an ti a. Portal- a upload leh chhinchhiah fel chungchangah DAMC ten a hma lamin Secondary Collection Centre (SCC) Coordinator thar ruahmanna siampui ni se tih a ni. Sawhthing lei thawhhnihnaa Society in register thar turte tan Line department ten chak zawkin hma lo lak pui se an ti bawk.
Vawiin Lawngtlai District Agricultural Marketing Committee (DAMC) thutkhawmah hian DAMC Member- te an telkim tha hle a, Pu David Lalrinawma, Addl. Deputy Commissioner, chuan lawm thu sawina neiin hun a khar.
