DIRECTORATE OF INFORMATION & PUBLIC RELATIONS, Government of Mizoram, India

485/2025-2026

Lunglei, 2025 Ṭomir thla ni 7: Vawiin khan Lunglei District Deputy Commissioner Office hma laknaa mipuite'n sawrkar hma lakna hrang hrangte an chhawr ṭangkai theih nan an khuaa kal chilha service hrang hrang chhawp chhuahsakna, "I Kawtkaiah Sawrkar" (Prashasan Gaon Ki Ore) hun chu Tlabung khua leh a chhehvel mipuite tan Tlabung SDO Office tualah buatsaih a ni.

Tlabunga "I Kawtkaiah Sawrkar" hun buatsaih hi Lunglei Sub-Divisional Officer (Sadar) Pi TT Beikhaizi chuan hmanpuiin, mipuite tana an kawtkaia service hrang hrang chhawp chhuahsaktu department leh thawktute chungah lawm thu a sawi a. I Kawtkaiah Sawrkar programme chu Lunglei DC ruahmannain khaw hrang hrangah hlawhtling taka buatsaih a nih tawh thu leh buatsaih chhunzawm zel tum a nih thu sawiin, District mipuite'n ṭangkai taka an hman zel a beisei thu a sawi.

He hun hi Tlabung Sub-Divisional Officer (Civil) Pu Moses Lalfakawma Tlau chuan kaihruaiin, thingtlang khaw kilkhawr zawka chengte'n sawrkar hma lakna hrang hrang an hriat a, awlsam zawka sawrkar office an dawr theihna tura Lunglei DC ruahmanna chu lawmawm a tih thu sawiin, Tlabung mipuite chu chhawr ṭangkai ngei tum turin a chah a ni.

Vawiina Tlabung "I Kawtkaiah Sawrkar" tih hun buatsaihah hian office hrang hrang - Deputy Commissioner, Election Branch, Agriculture, Horticulture, Animal Husbandry & Veterinary, Women & Child Development (ICDS), Rural Development Block Development Office, FCS&CA (Supply), Commerce & Industries, Health & Family Welfare, Mizoram Rural Bank, PHED, PWD leh MVI te'n stall hawngin, awlsam zawka mipuite dawr theih turin an inpho chhuak a. Electoral roll enfiah/inziah luh, Aadhaar siam ṭhat/siam thar, income & tribal certificate dil, ration card siam ṭhat, bank account hawn thar, hriselna dinhmun endik & ABHA Card siam, ran entir leh ui a hri (anti rabies vaccine) pek, thei leh thlai chi sem, sawrkar scheme hrang hrang inhrilhfiah leh inziah luh leh mipuiin harsatna an thlenna hun te buatsaih a ni.

I Kawtkaiah Sawrkar programme hi January ni 14, 2025 khan bul ṭan a ni a. Haulawng, Ralvawng leh Bunghmunah te buatsaih tawh niin, he'ng khaw pathum aṭang hian mi 1,160-in service hrang hrang chhawp chhuahte hi an chhawr ṭangkai tawh a. Tun May thla chhung hian khaw 2 - Lungsen leh Bualteah te la buatsaih chhunzawm tura ruahman a ni.

Attachment